Самарқандда ҳокимият захирасидаги ерни 65 минг долларга сотишга уринган шахслар ушланди

Самарқанд вилояти Паст Дарғом туманида 70 сотих ерни ноқонуний сотиш ҳолати аниқланди. Бу ҳақда вилоят Ички ишлар бошқармаси хабар қилди.

Қайд этилишича, 31 май куни Самарқанд вилоят ИИБга фуқаро М.А. ариза билан мурожаат қилган. Унда иссиқхона қуриб тадбиркорлик билан шуғулланиши учун Паст Дарғом тумани ҳудудидан ер олмоқчи бўлганида ўзини Кадастрлар палатаси туман филиали ходими деб таништирган Д.М. билан танишиб қолганини айтган. Д.М. ўзининг таниши Б.С. нинг сотиладиган ер майдони борлигини айтиб, у билан учраштирган. Б.С. Паст Дарғом тумани «Тўрттом» маҳалласи ҳудудида жойлашган ҳокимият захирасида бўлган қишлоқ хўжалигига мўлжалланган ҳамда вақтинча қишлоқ хўжалиги маҳсулотларини етиштириш учун ўзи фойдаланиб келаётган 70 сотих ер майдонини ўзига тегишли эканини айтган. 65 минг долларга сотишини ҳамда Д.М. мазкур ер майдонини 3 минг доллар эвазига кадастр ҳужжатларини расмийлаштириб беришини билдирган. Фуқаро улар келишилган пуллардан жами 33 минг долларини олдиндан беришини талаб қилаётганини маълум қилиб, қонуний чора кўришни сўраган.

Аризага асосан, шу куни Бош прокуратура, вилояти ИИБ, ДХХ Самарқанд вилоят бошқармаси ҳамда Самарқанд вилояти прокуратураси Ер ресурслари талон-торож қилинишини олдини олиш бўлими ходимлари ҳамкорлигида Паст Дарғом тумани «Беклар» МФЙда жойлашган умумий овқатланиш шохобчасида тезкор тадбир ўтказилган. Жараён давомида Д.М. ва Б.С. ариза муаллифи М.А.дан талаб қилинган пулдан 32 минг долларини аванс сифатида олган вақтида ашёвий далиллар билан қўлга олинган.

Ҳолат юзасидан Д.М. ва Б.С.га нисбатан Жиноят кодексининг 168-моддаси 4-қисми «а» банди (жуда кўп миқдорда фирибгарлик) билан жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Бўстонлиқда 1,32 гектар ерни 50 минг долларга сотишга уринган уч нафар шахс ушлангани, Самарқандда туман ҳокимининг сохта қарори билан қарийб 20 минг долларга ер сотган хўжалик раҳбари аниқлангани, Давлат кадастрлари палатаси Нуробод туман филиали мутахассислари 2 млн сўм пора билан ушлангани тўғрисида хабар берилганди.