Бир кечада юлдузга айланган, 19 ёшида фожиали ўлим топган Дивя Бҳарти: Болливуд юлдузининг тақдири қандай кечган? (фото)

Дивя Бҳарти актриса сифатида бир кечадаёқ машҳур бўлган. Унинг фильмографияси «Шудринг ва олов», «Қўшиқчи», «Ғазабланган уч эркак-2» блокбастерлари билан ажралиб туради. Болливуд осмонида ёрқин юлдуз бўлиб порлаётган актриса лов этиб олов ичида қолиб кетди. Мисли кўрилмаган шон-шуҳрат, шошма-шошарлик билан тузилган никоҳ ва ўзининг ҳаддан ташқари эмоционаллиги Дивяни фожиага олиб келган бўлиши мумкин. 1993 йил 5 апрелда 19 ёшли актриса квартирасининг 5-қаватидан йиқилиб вафот этади, бу ўлим бугунги кунгача мухлислар томонидан ҳалигача сабаби аниқланмаган ва кечириб бўлмас жиноят деб ҳисобланади.

Болалигида Дивя чиройлилигидан қўғирчоққа ўхшарди. Ҳали мактабда ўқиётганидаёқ қизалоқ «Ёлғон» (1983) фильмидаги Шридевига тақлид қилиб кўзгу олдида рақсга тушишни яхши кўрарди. 9-синфда ўқиб юрганида Говинданинг акаси, продюсер Кирти Кумар уни «Радҳа билан келишув» (1992) фильмида суратга тушишга таклиф қилади.

Дивя рақс, актёрлик ва қўшиқ айтишни ўрганиш учун мактабни ташлашга қарор қилади. Кирти ўз персонажини сир сақламоқчи эди, бироқ дўстлари билан вақт ўтказишни яхши кўрадиган Дивя актриса бўлишини ҳаммага айтиб қўяди. Натижада у ролдан четлаштирилади, унинг ўрнига эса Жуҳи Чавлани олишади.

Ўша пайтда Бони Капур «Сирли севги» (1995) фильми учун янги чеҳра излаётганди ва Дивяга қизиқиш билдиради. Бироқ унинг ўрнини Табу эгаллайди. Режиссёр Субҳаш Гҳай Бҳарти «Савдогар» (1991) фильмига Дивяни таклиф қилади, аммо бу рол Маниша Койралага насиб этади. Воқеаларнинг бундай тус олишидан хафа бўлган Дивянинг онаси қизини Кашмирга таътилга олиб кетади.

Аммо таътилдан тезда қайтишга тўғри келади, чунки продюсер Рама Наиду қизга «Бобиллик рожа» (1990) фильмидан рол таклиф қилиш учун Мумбайга келади ва бу фильм супер хитга айланади. 1992 йил Дивя Бҳарти учун шов-шувли йил бўлди. У 11 та фильмда суратга тушади, жумладан, «Бебош муҳаббат», «Шудринг ва олов», «Кабаре раққоси» ва «Кучли эркак», актрисанинг ўзи эса «Йилнинг энг яхши янги чеҳраси» номинациясида Filmfare мукофотини қўлга киритади.

Ўйин-кулги ва ҳазилларга муккасидан кетган Дивя кўнглига келган ишни қиларди. Туғилган кунида у машина капотида рақсга тушади, «Кабарет раққоси» фильмининг суратга олиш майдонида Шоҳруххонни тимдалаб олади ва хореограф Сарож Хонни ҳазиллашиб «семиз» деб атайди. Туйғуларга берилган ҳолда 1992 йил 10 майда режиссёр Сажид Надиадвалага турмушга чиқади. Дастлаб бу никоҳ ҳаммадан сир сақланади. Чунки 19 ёшидаёқ унинг шон-шуҳрати осмонга кўтарилганди.

Аммо 1993 йил 5 апрель куни ҳаммаси барбод бўлади. Ўша машъум кунда Дивя телугу фильмини суратга олиш учун Ҳайдарободга учиши керак эди. Аммо кейинчалик унинг оиласи сўзлаб берганидек, у съёмкага бормаслик учун оёғини боғлаб юрган. Шу куни у отаси ва акаси Кунал билан нуфузли ҳудуддан квартира сотиб олишга боради. Битимдан хурсанд бўлган Дивя кўчанинг ўзидаёқ маза қилиб рақсга тушади.

Соат 22:00 да эри қўнғироқ қилиб, уни уйда либослар бўйича дизайнери Нита Лулла ва унинг психиатр эри доктор Шям Лулла (маълумотларга кўра, Дивяни депрессиядан даволаётган бўлган) кутаётганини айтади. Кунал Дивяни Сажиднинг уйи ёнида, Версова туманидаги квартирада қолдиради. Айтишларича, у Сажид билан лифтда учрашган. Эри аэропортга кетаётган бўлган — у Маврикийга учиши керак эди. Дивянинг акаси эндигина ўз уйига кириб келганида унга қўнғироқ қилишиб, Дивя 5-қаватдан йиқилиб тушганини айтишади.

Маълум бўлишича, бу бахтсиз ҳодиса бўлган – актриса дераза токчасига ўтирганида мувозанатни йўқотиб, йиқилиб тушган. У касалхонада вафот этади. Бу хабарни эшитган отасининг ҳам аҳволи оғирлашади — унга тиббий ёрдам кўрсатилади — у севимли қизининг ўлимидан ўзини қўярга жой тополмайди. Сажид ақлдан озар даражага тушиб, тез-тез ҳушидан кетарди. Гипертензия туфайли уни интенсив терапияга ётқизишга тўғри келади.

Дивя 5 апрель куни вафот этади, 7 апрель куни у кремация қилинади. 19 ёшли қиз синдур суртилган ҳолда келинлик либосида дафн қилинади. Дафн маросимини Сажиднинг ўзи бажаради. Дивянинг хизматкори Амрита қадрдон одамини йўқотганига чидай олмай, бир ой ўтиб юрак хуружидан вафот этади. Дивянинг даҳшатли ўлими атрофида бир нечта тахминлар пайдо бўлади. Гиёҳвандлик ва спиртли ичимликларни истеъмол қилишдан тортиб қотиллик ва ўз жонига қасд қилишгача. Ўша оқшом Бҳарти бир оз Маврикий ромини ичган, лекин онаси унинг гиёҳванд моддаларни истеъмол қилмаганини қайта-қайта таъкидлайди.

«Тўғри, қизим ўзига зарар етказишга мойил эди. У «Радҳа билан келишув» фильмидан четлаштирилгач, билакларини кесиб ташлаган. Жаҳли чиққандагина ўзига зарар етказиши мумкин эди. Ўлимидан бир неча ой олдин у Америкага борган. У ерда нимадандир хафа бўлиб, сигарет қолдиғи билан ўзини куйдирган. Ўлганида ҳам қўлларида куйиш излари бор эди», деб эслайди онаси Мита Filmfare нашрига берган интервьюсида. Вақт ҳатто энг оғриқли яраларни даволайди, деб бежизга айтилмаган. Дивянинг турмуш ўртоғи Сажид Надиадвала 2000 йилда журналист Варда Хон билан турмуш қуради.

Улар Бҳартилар оиласи билан яқин алоқада бўлиб, ҳолидан хабар олиб туришади. Сажид ва Варда ўғиллари Субхон ва Суфиён билан тез-тез Дивянинг ота-онасиникига келишар, уларни ойи, дада деб чақиришар, байрамларни бирга нишонлашарди. Дивянинг онаси Мита 2018 йилнинг 20 апрелида буйрак касаллигидан вафот этади, отаси Ом Пракаш эса 2021 йил 30 октябрда дунёдан кўз юмди.