Шавкат Мирзиёев раислигида видеоселектор йиғилиши бошланди. Давлат раҳбари матбуот котибининг ёзишича, президент сўзининг аввалида Ўзбекистон Қаҳрамони Лолахон Муродовани хотирлаган.
Шавкат Мирзиёев Лола Муротовани кўп йиллардан буён жуда яхши билгани, охирги пайтларда бетоб бўлиб, даволанишга бўлганини таъкидлаган.
«Биз у киши билан доимо гаплашиб, самимий мулоқот қилар эдик. Хасталикларига қарамасдан, ҳар доим кўтаринки кайфиятда бўлиб, эл-юрт ташвиши, ўз касбига садоқат билан яшадилар. Ҳалол ва фидокорона меҳнатдан бир дақиқа ҳам тўхтамадилар.
Лолахон опа ҳаёти давомида жуда кўп қийинчилик ва синовларни бошидан ўтказдилар. Мустаҳкам иродаси ва матонатини намоён этиб, фақат олдинга интилиб яшадилар. Опанинг улкан ғайрат ва шижоатига қойил қолардим.
Ҳақиқий ўзбек деҳқон аёли тимсолига айланиб, давримизнинг чинакам қаҳрамони сифатида яшадилар. Ишончим комил, Лолахон опа яратган катта мактабни у кишининг шогирдлари, ўниб-ўсиб келаётган ёшларимиз, албатта, муносиб давом эттиради. Бу фидойи ва ватанпарвар юртдошимизнинг ёрқин хотираси қалбларимизда ҳамиша сақланиб қолади», — деган давлат раҳбари.
Аввалроқ президент матбуот котиби Шерзод Асадов Ўзбекистон Қаҳрамони, «Нурли обод» фермер хўжалиги раҳбари Лола Муротова бетоб бўлиб қолганини, Шавкат Мирзиёевнинг топшириғига кўра, бош вазир ўринбосари Шуҳрат Ғаниев, соғлиқни сақлаш вазири Беҳзод Мусаев, президент маслаҳатчиси ўринбосари А.Жўрабаев билан биргаликда вилоят шошилинч тиббий ёрдам марказида даволанаётган Ўзбекистон Қаҳрамони ҳолидан хабар олинганини маълум қилганди. Фарғонага ташрифи давомида Шавкат Мирзиёев Лола Муротованинг бетоблиги ҳақида ҳам тўхталиб ўтганди.
Лола Муротова 30 май куни 64 ёшида вафот этди. Шавкат Мирзиёев ушбу муносабат билан марҳуманинг оила аъзолари ва Фарғона вилояти фаолларига ҳамдардлик билдирганди.
Изоҳ (0)