2022 йилнинг январь—апрель ойларида Ўзбекистон 18 та хорижий давлатга 4,1 млн долларлик 4,3 минг тонна қалампир экспорт қилган. Бу ҳақда Статистика қўмитаси хабар берди.
Ўзбекистондан энг кўп аччиқ қалампир сотиб олган давлатлар:
- Қозоғистон — 2,8 минг тонна;
- Қирғизистон — 432 тонна;
- Россия — 250 тонна;
- АҚШ — 219,4 тонна;
- Германия — 143,4 тонна;
- Украина — 86,1 тонна;
- Тожикистон — 79,4 тонна.
Қалампир экспорти ўтган йилнинг мос даврига нисбатан 1,1 минг тоннага камайган.
Амалга оширилмаган режалар
2018 йилда аччиқ қалампирни оммавий ишлаб чиқариш бошланиши мўлжалланган эди.
Ҳукумат қарорига кўра, янги ҳосил Қорақалпоғистон, Бухоро, Қашқадарё, Наманган, Фарғона ва Хоразм вилоятларида 17,1 минг гектардан ортиқ майдонда етиштирилиши режалаштирилган.
Индонезиядан уруғ олиб келиб, қалампир экиш учун 17 минг 117 гектар ер ажратиш режалаштирилган. Бу майдондан йилига 200 минг тоннадан ортиқ ҳосил олиниши кутилмоқда.
EastFruit экспертларининг қайд этишича, режалар кўп сабабларга кўра амалга оширилмаган. Соҳа бўйича билимларнинг етишмаслиги, паст ҳосилдор тупроқдан фойдаланиш, молиялаштириш билан боғлиқ муаммолар ва ташкилий бўлимлар ўртасидаги мувофиқлаштиришнинг йўқлигини сабаб қилиб кўрсатиш мумкин.
Аввалроқ Ўзбекистон январь ойида 1,5 млн долларлик қалампир экспорт қилгани ҳақида хабар берилган эди.
Изоҳ (0)