«Пул чақиради, ақлдан оздиради ва кунлаб туради». Атирлар ҳақида энг кўп тарқалган хато тушунчаларга мутахассис изоҳ беради

Ҳеч кимга сир эмаски, хушбўй ифорлар кайфиятни кўтаради. Одамни ўзига бўлган ишончини орттирибгина қолмай, бошқаларда ҳам ёқимли таассурот уйғотади. Шу боисдан ҳам атирдан нафақат аёллар, балки эркаклар ҳам бирдай фойдаланади.

Шунинг учун ҳам парфюмерия воситаларининг бозори чаққон. Аммо аксарият тадбиркорлар ўз маҳсулотларини сотиш мақсадида турли ёлғонларни ўйлаб топади. Мисол учун «пул чақирадиган», «ақлдан оздирадиган» , ҳиди «кунлаб» турадиган атирлар, хуллас, бу рўйхатни узоқ давом эттириш мумкин.

«Дарё» аромастилист (атирлар бўйича мутахассис) Дилшод Ҳожиқурбонов билан бўлган суҳбатда атирлар ҳақида халқимиз орасида энг кўп тарқалган хато тушунчаларга ойдинлик киритди.

Биринчи нотўғри тушунча: Одамни «ақлдан оздирувчи» феромон атирлар 

Ижтимоий тармоқлар орқали кўпчилик ёшлар, айниқса, йигитлар «феромон атир борми?», деб сўрашади, ёзишади.

Феромон бу қарама-қарши жинс вакилини ҳиссиётларини уйғотувчи, ўзига жалб қилувчи қисқа қилиб айтганда, ҳидлаганда одамни ақлдан оздириб қўювчи ифордир. Аслини олганда ҳар қандай парфюм феромон хусусиятига эга.

Ўзидан ёқимли ифор таратиб турган кишига нисбатан яхши таассурот уйғониши, ён-атрофидагиларининг баъзиларига жуда ёқиши мумкин. Лекин ақлдан оздириб қўядиган даражада бўлмайди. Чунки инсон онгли мавжудот.

Қолаверса, дунёда ҳали ҳаммага бирдай ёқадиган ифор яратилмаган, яратилмайди ҳам. Сабаби бармоқ изларимиз каби дидларимиз ҳам турлича. Бир кишига хуш келган ифор ҳатто унинг эгизагига ёқмайди-ку, бошқаларни қўяверинг. Агар сизга қайсидир сотувчи мана бу феромон атир деса, асло ишонманг, бу шунчаки маркетинг ва реклама.

Иккинчи нотўғри тушунча: «Пул чақирадиган» атирлар

Халқимиз орасида «атирлар пул чақиради» деган гап-сўзлар юради. Чунки айрим парфюмерия билан шуғулланадиган тадбиркорлар ва блогерлар юртдошларимизнинг энг нозик жойидан фойдаланиб, шундай реклама қилади.

Биринчидан бу ширк. Ризқ Аллоҳдан, бирор атир ёки бирор буюм сизга пул олиб келмайди. Фақат қаттиқ меҳнат орқали ҳалол даромад қилиш мумкин.

Учинчи нотўғри тушунча: «Оригинал атирларнинг ҳиди кунлаб туради»

Кўпчилик одамлар оригинал атирларнинг ҳиди кунлаб туради деб ўйлайди. Шу боисдан ҳам аксарият мижозлар олдимга «мана бу ердан атир олгандим, оригинал деб алдаб сохтасини сотибди. Ҳиди узоқ турмаяпти» деб шикоят қилиб келади.

Тўғри, ифори кун давомида турадиган атирлар ҳам бор, лекин аксарият парфюмлар (300 доллар бўладими ёки 500 долларми аҳамиятсиз) танада 8-10 соатдан ортиқ турмайди. Айниқса, ўзбекистонликларда.

Сабаби «иссиқ», «совуқ мижоз» турлари бор. Бизни минтақада яшайдиганларнинг кўпи «иссиқ мижоз». Шунинг ҳисобига атир ўз кучини бирданига кўрсатади ва тез парланиб кетади. Совуқ мижозларда эса аксинча, секин «очилади» ва кўп вақт сақланади.

Баъзилар «мен кийимимга оддийини сепгандим, лекин ҳиди 3-4 кунлаб турди-ку» дейиши мумкин. Тўғри, шундай бўлиши мумкин, чунки атир сепилган кийим одатда шкафда туради. Ҳаво кирмагани ҳисобига ҳам ифор кунлаб сақланади.

Яна бир муҳим факт: оригинал атирлар танада узоқ муддат туришида эмас, ҳидининг ноёблиги билан белгиланади. Қолаверса, терига зарари ҳам бўлмайди.

Тўртинчи нотўғри тушунча: «Ёзда атир сепмаслик керак»

Баъзилар «одам ёзда чўмилиб юрса етади, атирни қишда сепиш керак» дейишади. Мен эса аксинча, ёзда парфюмлардан кўпроқ фойдаланган маъқул деб ўйлайман. Сабаби иқлими иссиқ мамлакатда яшаймиз.

Одам бироз ҳаракат қилиши билан терлайди ва ўзидан ёмон ҳид чиқаради. Энг ёмони, буни ўзи билмайди. Жамоат транспортларида бошқаларга ноқулайлик туғдиради.

«Кечки пайт тишингни соғлиғинг, эрталаб эса гўзаллик учун ювасан» деганларидай ёзда ёмон ҳидларнинг олдини олиш, қишда эса ёқимли кўриниш учун атирлардан фойдаланган маъқул.

Бешинчи нотўғри тушунча: «Оригинал атир ҳиди сепган одамни ўзига билинмайди»

Бу ҳам қисман нотўғри фикр сабаби бу парфюмнинг оригинал ёки сохталигидан эмас, шунчаки, атир сепилганидан 5-10 дақиқа ўтиб, инсон ифорга кўникади. Шунинг ҳисобига ўзига билинмаслиги мумкин.

Мисол учун: ошхонага кирганингизда овқат ҳиди келиб турган бўлса, бироздан кейин у сизга сезилмай қолади. Хонада ҳид йўқолгани учун эмас, шунчаки бурнингиз бу ҳидга ўрганади. Лекин ҳар ўпкада ҳаво янгиланганида яна ифор таралаверади.

Тўғри, агар сепган атри кишини ўзига умуман ёқмаган бўлса, кун давомида ўзига жуда билиниб туради.

Олтинчи нотўғри тушунча: «Оқ кийимга сепилган атирнинг доғи қолади»

Тўғри, кийимда из қолдириш эҳтимолига эга ёғли, рангли атирлар бор, лекин ҳамма парфюм шундай дегани эмас. Аксарияти кийимда тез қуриб қолади. Умуман олганда, бу ҳам нотўғри фикр.

Еттинчи нотўғри тушунча: «Атир сочга сепилса, тўкилиб кетади»

Ҳатто соч учун мўлжалланган аксарият ниқоблар ҳам одатда илдизига эмас, учига суртилади.

Атирлар ҳам учларига пуркалса ёки тароққа сепиб таралса, бош қисмига ҳам сочга ҳам асло зарар қилмайди. Аксинча, ифорнинг кўпроқ тарқалишга ҳисса қўшади.