Самарқандда ер сотиш билан боғлиқ ноқонуний ҳолатга чек қўйилди, деб хабар беради Бош прокуратура ҳузуридаги департамент.
Маълум қилинишича, ДХХ Самарқанд вилояти бошқармаси ҳамда вилоят ИИБ ЖҚБ Коррупция ва иқтисодий жиноятларга қарши кураш бўлими ходимлари ҳамкорлигида тезкор тадбир ўтказилган. Тадбир давомида Самарқанд туманида яшовчи, вақтинча ишсиз Х.С. мазкур тумандаги маҳаллий фуқаронинг номига расмийлаштирилган иссиқхона қуриш учун ажратилган 50 сотих ер майдонининг 5 сотихини бошқа бир фуқаронинг номига трикотаж маҳсулотлари ишлаб чиқарувчи фабрика қуриш учун расмийлаштириб беришни ваъда қилгани аниқланган. Бунинг эвазига ундан 100 минг доллар талаб қилиб, сўралган пулнинг 70 минг долларини олаётган вақтида жиноят устида ушланган.
Ҳозирда ушбу шахсга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Тошкентда 1 гектар ер майдонини 1 млн долларга сотишга уринган шахслар ушлангани, Сурхондарёда 20 сотих ерни уч кишига 220 млн сўмга сотиб, ҳужжатларни расмийлаштириб бермаган шахс аниқлангани, Андижонда сотиш тақиқланган ерни 9 минг долларга сотиб юбормоқчи бўлган шахс ушлангани тўғрисида хабар берилганди.
Изоҳ (0)