Бу чиндан ҳам печда пиширишни талаб қилмайдиган энг мукаммал ва осон тайёрланадиган чизкейк. Уни 30 дақиқада тайёрлаб, дастурхонга десерт сифатида тортиш мумкин. Marie Claire нашри тақдим этган янги рецептга кўра, ушбу ширинликни, албатта, тайёрлаб кўришни тавсия қиламиз.
Керакли маҳсулотлар:
Хамир учун:
- печенье — 200 грамм;
- жигарранг шакар — 70 грамм;
- сариёғ — 120 грамм.
- қаймоқ — 300 мл;
- пишлоқ — 700 грамм;
- сметана — 60 грамм;
- шакар — 100 грамм;
- шакар упаси — 15 грамм;
- лимон шарбати — 2 чой қошиқ;
- ваниль — 1 чой қошиқ.
Аввал хамир учун ажратилган маҳсулотлар яхшилаб аралаштирилади. Печенье блендер ёрдамида майдаланади.
Сўнгра 22 сантиметр айлана шаклида ёки ундан ҳам кичикроқ қолипга ҳосил бўлган масса солинади. Масса бир-бирига яхшилаб ёпишиши учун стаканда яхшилаб босиш лозим.
Начинка тайёр бўлгунга қадар қолипдаги корж музлаткичда 10-20 дақиқага қолдирилади. Навбат чизкейкнинг асосий қисмига келди. Миксер ёрдамида қаймоқ 5 дақиқа давомида ўртача тезликда аралаштирилади.
Сўнгра пишлоқ ва шакар ҳам силлиқ бўлгунча миксер қилинади. Шакар упаси, сметана, лимон шарбати ва ваниль қўшилади. 2-3 дақиқа давомида аралаштирилади.
Кўпиртирилган қаймоқ ҳамда пишлоқли аралашма қўшилиб, эҳтиёткорлик билан аралаштирилади. Музлаткичга қўйилган қолипга аста-секин қаймоқли масса солинади. Юзаси силлиқланиб, қаттиқ бўлиши учун фольга ёки полиэтилен пакет билан маҳкам ёпилади.
Чизкейкни музлатиш учун камида 6-8 соатга, узоғи билан 2 кунга музлаткичга қўйиш мумкин. Лекин ўртача меъёр 12 соатни ташкил этади. Керакли вақтдан кейин пичоқ ёрдамида чизкейк қолипдан ажратиб олинади.
Таъбга кўра, десерт юзаси мева, шоколад ёки бошқа безаклар билан тўлдирилиши мумкин.
Дастурхонга ширинлик чиройли бўлакларга бўлиниб, тортилади. Эслатиб ўтамиз, мазкур ширинликни 5 кунгача музлаткичда сақлаш мумкин.
Ёқимли иштаҳа!
Изоҳ (0)