Bor-yo‘g‘i 10 daqiqa ichida tayyorlanadigan shokoladli fondan retsepti

Lifehacker nashri taqdim etgan mazkur retsept juda ham oson usulda tayyorlanadi. Shokoladli fondan fransuzcha shirinlik bo‘lib, uni tayyorlash uchun 5 xil mahsulot va atigi 10 daqiqa kerak bo‘ladi.

Kerakli mahsulotlar:

• qora shokolad — 90 gramm;
• sariyog‘ — 35 gramm;
• tuxum — 1 dona;
• shakar — 25 gramm;
• un — 1 osh qoshiq.

Tayyorlanish jarayoni:

Shirinlikni tayyorlash sariyog‘ va shokoladni eritib olishdan boshlanadi. Buni mikroto‘lqinli pech yoki bug‘da ham amalga oshirish mumkin. Aralashma xuddi ganashga o‘xshashi kerak.

Shakar bilan tuxum alohida idishda aralashtirib olinadi. Ta’bga ko‘ra shakar miqdorini kamaytirish mumkin.

Yuqoridagi ikki massa bir-biri bilan aralashtiriladi va ustidan un qo‘shiladi.

Shirinlik qoliplariga sariyog‘ surtiladi va tayyor bo‘lgan massa idishning yarmigacha quyiladi.

Fondanlar oldindan 180 darajada qizdirilgan pechda 10 daqiqa davomida pishiriladi.

Tayyor bo‘lgach fondanlar tekis idish ustiga o‘girilib, kakao, shakar upasi, meva yoki bir qoshiq muzqaymoq bilan bezatilib, dasturxonga tortiladi.

Yoqimli ishtaha! Mavzuga doir:

• Qat-qat xamir va quyultirilgan sutdan tayyorlanadigan mazali rogalik retsepti 
• Qulupnayli desert: oilangiz va mehmonlaringizni hayratda qoldiradigan 4 ta ajoyib retsept
• Fransuz ayollari xush ko‘radigan yogurtli tort retsepti
• Bor-yo‘g‘i 20 daqiqada tayyor bo‘ladigan mazali rulet retsepti