Ўзбекистонда 2022 йил 1 январдан харид чекларини «Солиқ» мобил дастури орқали рўйхатдан ўтказган жисмоний шахслар харид суммасидан 1 фоиз кэшбэкка эга бўлмоқда. Давлат солиқ қўмитасининг маълум қилишича, апрель ойида истеъмолчиларга 40 миллиард сўмга яқин кэшбэк тўлаб берилган.
Маълум қилинишича, апрель ойида 427 минг нафар истеъмолчи томонидан 8 миллионтага яқин чек «Солиқ» мобил дастури орқали рўйхатдан ўтказилган бўлиб, шундан 7,5 миллионтага яқин чекларга 61,4 миллиард сўм кэшбэк ҳисобланган.
27 май ҳолатига 340 мингдан ортиқ истеъмолчиларга 38,6 миллиард сўм кэшбэк тўлаб берилган.
Қолган кэшбэк суммалари тадбиркорлик субъектлари томонидан солиқ ҳисоботлари топширилиши, ҳисоботлардаги камчиликлар тузатилиши, солиқ қарздорлиги камайтирилиши инобатга олиниб, автоматик тарзда тўлаб борилади.
Эслатиб ўтамиз, 2021 йилнинг октябрь ойида президентнинг назорат-касса техникасидан фойдаланишни такомиллаштиришга доир қарори қабул қилинганди. Ҳужжат билан 2022 йил 1 январдан бошлаб чакана савдо, умумий овқатланиш ва аҳолига маиший хизмат кўрсатиш объектларида харидни амалга оширган ҳамда ушбу харидни солиқ органларининг махсус мобил иловасида харид чекининг QR kod ёрдамида сканерлаш орқали рўйхатдан ўтказган жисмоний шахсларга уларнинг банк карталарига ой якуни билан харид суммасининг 1 фоизи республика бюджетидан қайтарилади.
ДСҚ маълумотига кўра, эндиликда чекда МХИК коди тўғри кўрсатилган барча товарлар (хизматлар) учун кэшбэк тақдим этилади. Рад этиш тўлиқ харид суммасига (бутун чек учун) эмас, балки фақат маълумотлар базасида мавжуд бўлмаган МХИК коди кўрсатилган маҳсулот (товар ва хизмат)ларга нисбатан қўлланилади.
Изоҳ (0)