«Унинг феъли кимгадир ёқади, кимгадир йўқ». Юлдуз Усмонованинг опаси синглисининг болалиги, феъл-атвори ҳамда ёшлигидан қаттиқ ишлагани ҳақида (видео)

Ўзбекистон халқ артисти Юлдуз Усмонова 2022 йилнинг май ойи охирида беш кунлик концерт дастурини мухлисларига ҳавола қилмоқда. «Дарё» мухбири Миролим Исажонов концерт репетиция жараёнидан репортаж тайёрлаш вақтида санъаткорнинг иккинчи опаси Дилором Усмонова билан ҳам суҳбатлашди.

Дилором Усмонова синглисининг ёшлик пайти ҳақида гапираркан, Юлдуз Усмонова кичкиналигидан интилувчан бўлганини таъкидлади.

«Оилада тўрт ўғил ва тўрт қизмиз, Юлдуз олтинчи фарзанд. Синглим ёшлигида тартибли, узоқни кўра биладиган, интилувчан қиз бўлган. Бир ишнинг бошини туца, уни охиригача гўзал якунлашга ҳаракат қиларди ва буни уддаларди. Бу унинг характерида бор эди.

17-18 ёш пайтида фабрикада ишлаган. Ўша пайтларда ҳам саҳарлаб фабрикага ҳаммадан биринчи борарди. «Мен яхши ишлашим, биринчи бўлишим керак», дерди. Ўшанда унинг номзоди депутатликка қўйиладиган бўлган. Аммо Юлдузнинг ёши етмаган. Ёши каттароқ бўлганида, депутатлик мақомига эришарди.

Фабрикада ишлаган вақтларида ҳам санъат шайдоси эди, қўшиқлар айтиб турарди. Гавҳархоним, Тамарахонимлар овозини эшитиб, ўзлари билан Юлдузни олиб кетишмоқчи бўлган. Лекин уйдагилар кўнмаган. Охири дадам раҳматли рози бўлиб, Тошкентга жўнатган ва шундан кейин кўкариб, эл меҳнатини қилиб келмоқда. 12-14 ёшида «Ҳаммаларингиз ҳали кўрасизлар, мен шундай Юлдуз бўламан», дерди ва мақсадига эришди.

Ҳар йили концертлари ва тайёргарлик жараёнларида иштирок этаман. Ҳеч қандай вазифам йўқ бўлса-да, олдида туриб, қўллаб-қувватлаймиз. Унинг хатти-ҳаракати, ўзига бўлган талабини кўриб, ҳам ҳавас қиламан, ҳам қойил қоламан. Чарчаса ҳам, чарчадим демайди, ўзини аямайди. Шунинг учун ҳам унга истеъдодни Худо юқтирган бўлса керак. Интилганга толе ёр, дейишади-ку. Қилаётган меҳнатлари, ҳаракатлари учун мукофотларни Яратгандан оляпти», — дейди ўзбек примадоннасининг опаси.

— Ижтимоий тармоқларда Юлдуз Усмонованинг айрим фикрлари муҳокамаларга сабаб бўлган пайтларда жигар сифатида қандай ҳолатга тушасиз? Ичингиз ачишса керак?

— Биласизми, мевали дарахтга тош отилади. Ўзим ҳам одамлар ичида кўп юраман. Аксарият одамлар Юлдузнинг қўшиқларини севади. Унинг феъли кимгадир ёқади, кимгадир ёқмайди. Лекин биз унга ўрганиб қолганмиз, оддий ҳол сифатида қабул қиламиз.

Ҳозир ижтимоий тармоқлар ривожланиб кетди, ҳамма тўғри ёки нотўғри бўлса ҳам, фикрини эркин билдиряпти. Олдин бундай бўлмаган. Ўз тарбиясидан келиб чиқиб, тарбиясиз фикрлар айтганларга эътибор бермаймиз.

Ҳар қандай инсоннинг ўзига яраша феъл-атвори бор. Бизнинг Юлдуз шундай бўлишида ана шу феъли ёрдам берган. Ана шундай феълли бўлгани учун Юлдуз Юлдуз бўлган. Биз уни жудаям яхши кўрамиз. Қариндош-уруғлар барчамиз севамиз.

Репортажни «Дарё»нинг YouTube’даги саҳифаси орқали ҳам томоша қилишингиз мумкин.