Бухорода беш кун давом этиши режалаштирилган «Халқаро зардўзлик, заргарлик ва каштачилик санъати» фестивали тўртинчи куни якунланди. Фестивальнинг тақдирлаш ва ёпилиш маросими «Арк» қўрғони майдонида бўлиб ўтди, дея хабар бермоқда «Дарё» мухбири.
Ёпилиш маросимида икки минг нафардан ортиқ томошабин, 150 дан зиёд маҳаллий ва хорижий оммавий ахборот воситалари ходимлари, АҚШ, Россия, Англия, Янги Зеландия, Кувайт, Тожикистон, Малайзия, Индонезия каби давлатлардан келган хорижлик меҳмонлар ва ҳунармандлар иштирок этган.
Тантанада вилоят ҳокими Ботир Зарипов сўзга чиқиб, ўз табригида Бухоро санъати шоҳ асари ҳисобланган «Шашмақом» ЮНЕСКОнинг умуминсоний номоддий маданий мероси рўйхатига киритилганини эълон қилган.
Фестивальда қатнашган маҳаллий ва хорижий ҳунармандларнинг қўл меҳнатлари етти кишидан иборат халқаро ҳайъат томонидан баҳолаб борилган. Ғолиблар «Энг яхши заргарлик ташкилоти», «Энг яхши зардўзлик ташкилоти», «Энг яхши зардўз», «Энг яхши заргар», «Энг яхши зардўзлик мактаби устаси», «Зардўзлик бўйича қадимий сулола давомчиси», «Заргарлик бўйича қадимий сулола давомчиси» каби 40 дан ортиқ номинациялар бўйича тақдирланган. Уларга диплом ва пул мукофотлари топширилган.
Шундан сўнг хонандалар ҳамда Ўзбекистон давлат филармониясининг раққос ва раққосалари чиқиши намойиш этилган.
Изоҳ (0)