Ислом Каримов номидаги Тошкент халқаро аэропортида эстакадага кириш вақтинча ёпилди. Бу ҳақда Uzbekistan Airports хабар қилди.
Қайд этилишича, ушбу ўзгариш эстакадага кириш йўл белгилари янгиланиши муносабати билан содир бўлган. Ҳаракат 25 май куни тушдан кейин қайта тикланади.
«Вақтинчалик юзага келган ноқулайликлар учун узр сўраймиз», — дейилади хабарда.
Тошкент халқаро аэропорти эстакадаси
20 йилдан ортиқ (1999 йилда Тошкентда содир бўлган терактлардан сўнг) муддат давомида кутиб олувчи ва кузатувчилар пойтахт аэропортининг терминал биносига кириш имконига эга эмас ва ҳар қандай об-ҳаво шароитида ҳам ташқарида бўлишлари талаб қилинади. Халқаро аэропортда кутаётганлар учун айвон мавжуд, аммо маҳаллий авиатармоқлар терминали олдида одамлар кўчада кутишига тўғри келади. 2021 йилнинг июлида аэропортининг эстакадаси транспорт ҳаракати учун тест режимида очилганди. Бутун эстакада бўйлаб транспорт воситаларининг рақамларини танийдиган, турини аниқлай олувчи ва улар томонидан йўл ҳаракати қоидаларига риоя қилинишини назорат этувчи интеллектуал видеокузатув камералар тизими ўрнатилган.
Жорий йилнинг февраль ойида йўловчи ва кузатувчилар учун Ислом Каримов номидаги Тошкент халқаро аэропорти терминалининг эстакадасига кириш эркин бўлганди. Uzbekistan Airports эстакадада ҳаракатланиш қоидаларини эълон қилди. Унга кўра, эстакада бўйлаб терминалга ўтиш қоидалари:
- эстакаданинг ўнг томондаги чизиғи сайёҳлик автобуслари ва микроавтобуслар учун, чап томондаги чизиғи эса таксилар учун мўлжалланган;
- таксилар учун эстакадада йўловчиларни олиш/тушириш вақти 5 дақиқадан, сайёҳлик автобуслари ва микроавтобуслар учун 10 дақиқадан ошмаслиги керак;
- эстакаданинг ўнг ва чап чизиқларини ажратиб турадиган сариқ чизиқда тўхташ тақиқланади ва жарима тўланишини назарда тутадиган қоида бузарлик ҳисобланади.
Изоҳ (0)