«Қизларда IТ бўйича креатив фикрлаш йигитлардан кучлироқ» — мутахассис ахборот технологиялари соҳасида аёлларнинг роли ҳақида
ИТ соҳасида йигитларга нисбатан аёлларда диққат ва креатив фикрлашга мойиллик кучлироқ бўлади. Бу ҳақда Тошкентдаги Amity университети ректори Бобур Абдуллаев «Дарё» нашрига берган интервьюсида айтиб ўтди.
IТ соҳасида аёлларнинг ўрни муҳим
IТ соҳасида анча йиллардан бери ишлаётган мутахассис сифатида айта оламанки, ахборот технологиялари ривожида аёлларнинг ўрни муҳим. Сабаби йигитларга нисбатан аёлларда концентрация ва креатив фикрлашга мойиллик кучлироқ. IТ соҳасини, айниқса, дастурлашни бу хусусиятларсиз тасаввур қилиш қийин. Яхши дастурчи бўлиш учун бу жиҳатлар жуда муҳим. Лекин, афсуски, шу йилларгача бўлган даврда IТ соҳасида қизларимизнинг сони кўп бўлмади. Университетимиз очилган пайтда (2019 йилда) бор-йўғи 13 фоиз қизлар IТ соҳасини танлаган ва ўқий бошлаганди. Бугун бу кўрсаткич 30 фоиздан ошди. Соҳа борган сари ривожланяпти. Қизлар учун алоҳида дастурлар амалга оширилаётгани уларни IТ’га кириб келишига имконият яратмоқда. Қизларда уйдан туриб ишлашга имконият бор. Интернет бўлса, бу соҳада чегара йўқ. Фақат Ўзбекистон учун эмас, чет эл компаниялари учун ҳам уйдан туриб ишлаш мумкин. Албатта, ҳозирда шундай имкониятлардан фойдаланаётган қизлар кўп. Ҳамма қизлар ҳам ўқитувчи, тиббиёт ходими бўлиши шарт эмас. IТ — айнан қизлар қилиши мумкин бўлган, уларнинг потенциалини очиб берадиган соҳа.
Ҳар 6 ойда янги дастурлаш тиллари пайдо бўлмоқда
Ўзбекистонда IТ жуда яхши ривожланяпти. Лекин бундан ҳам тезроқ бўлишига эришиш мумкин. Форумлар, «1 миллион дастурчи» каби лойиҳаларни кўпайтириш, ёшларни шу йўналишга қизиқтириш келажакда мазкур соҳада кўп мутахассислар етишиб чиқишига олиб келади. Республикамизда бу бўйича потенциал катта. Ахир аҳолининг 65 фоизини ёшлар ташкил қилади. IТ — ёшлар соҳаси. Чунки бу соҳада ҳар 6 ойда янги технологиялар, янги дастурлаш тиллари пайдо бўлади. Тан олиш керак, ёшларда бундай янгиликлар, илғор технологияларни қабул қилишга мойиллик кучли.
Ҳозирда бизда чет эл IТ компаниялари оқими анча ортди. Жуда кўп IТ компаниялар мамлакатимизда ўз офисларини очмоқда. Бунга улар учун алоҳида имтиёзлар татбиқ қилинаётгани ҳам ижобий таъсир кўрсатмоқда. IТ’нинг зўр томони ҳам шу, унда чегара йўқ. Мутахассис ўзига қулай бўлган мамлакатга жойлашади ва дунёнинг хоҳлаган давлатига хизмат кўрсата олади. Бу соҳа ривожи Ўзбекистон учун валюта оқими, экспорт ҳажми ошишига ва умуман иқтисодиёт ўсишига олиб келади.
Хорижлик мутахассислар ёшларимизга билим бериш учун келмоқда. Бу жуда яхши тенденция. Аммо мутахассис келиб, кетаверса бизга фойдаси бўлмайди. Ундан билим олишимиз, технологияларни ўрганишимиз керак.
