Ҳукумат қарорига кўра, 2022/2023-ўқув йилидан давлат мактабларида ўқувчилар учун мактаб формаси тўлиқ жорий этилади. Бу ҳақда Telegram’даги «Ҳуқуқий ахборот» канали хабар қилди.
Қайд этилишича, илгари қарор 2024/2025-ўқув йилидан бошлаб жорий этилиши керак бўлган. 2022 йил 1 июнгача ҳудудлар кесимида 2022/2023-ўқув йилида мактаб формаларига эҳтиёж аниқланади.
Кам таъминланган оилалар фарзандлари учун мактаб формаси маҳаллий бюджет ҳамда «темир дафтар», «аёллар дафтари» ва «ёшлар дафтари» жамғармалари маблағлари ҳисобидан сотиб олишда кўмаклашилади.
Шунингдек, 2022 йил 10 августдан ҳар бир туман ва шаҳарда мактаб формаси ишлаб чиқувчиларнинг савдо шохобчалари ташкил этилади.
Маълумот учун, Вазирлар Маҳкамаси 2018 йил 15 августида ягона мактаб формаси бўйича қарор қабул қилган. Қарор билан тасдиқланган низомнинг 7-банди ижтимоий тармоқларда баҳс-мунозаралар, эътирозларга сабаб бўлган эди. Хусусан, ҳижобни ҳам тақиқлаган ушбу бандда, жумладан, шундай дейилган: «Ўқувчилар таълим муассасаси биноси ичида бош кийимсиз юришлари лозим, таълим муассасасида ўтказиладиган турли тадбирлар жараёни бундан мустасно».
Изоҳ (0)