IT sohasida yigitlarga nisbatan ayollarda diqqat va kreativ fikrlashga moyillik kuchliroq bo‘ladi. Bu haqda Toshkentdagi Amity universiteti rektori Bobur Abdullayev “Daryo” nashriga bergan intervyusida aytib o‘tdi.
IT sohasida ayollarning o‘rni muhim
IT sohasida ancha yillardan beri ishlayotgan mutaxassis sifatida ayta olamanki, axborot texnologiyalari rivojida ayollarning o‘rni muhim. Sababi yigitlarga nisbatan ayollarda konsentratsiya va kreativ fikrlashga moyillik kuchliroq. IT sohasini, ayniqsa, dasturlashni bu xususiyatlarsiz tasavvur qilish qiyin. Yaxshi dasturchi bo‘lish uchun bu jihatlar juda muhim. Lekin, afsuski, shu yillargacha bo‘lgan davrda IT sohasida qizlarimizning soni ko‘p bo‘lmadi. Universitetimiz ochilgan paytda (2019-yilda) bor-yo‘g‘i 13 foiz qizlar IT sohasini tanlagan va o‘qiy boshlagandi. Bugun bu ko‘rsatkich 30 foizdan oshdi. Soha borgan sari rivojlanyapti. Qizlar uchun alohida dasturlar amalga oshirilayotgani ularni IT’ga kirib kelishiga imkoniyat yaratmoqda. Qizlarda uydan turib ishlashga imkoniyat bor. Internet bo‘lsa, bu sohada chegara yo‘q. Faqat O‘zbekiston uchun emas, chet el kompaniyalari uchun ham uydan turib ishlash mumkin. Albatta, hozirda shunday imkoniyatlardan foydalanayotgan qizlar ko‘p. Hamma qizlar ham o‘qituvchi, tibbiyot xodimi bo‘lishi shart emas. IT — aynan qizlar qilishi mumkin bo‘lgan, ularning potensialini ochib beradigan soha.
Har 6 oyda yangi dasturlash tillari paydo bo‘lmoqda
O‘zbekistonda IT juda yaxshi rivojlanyapti. Lekin bundan ham tezroq bo‘lishiga erishish mumkin. Forumlar, “1 million dasturchi” kabi loyihalarni ko‘paytirish, yoshlarni shu yo‘nalishga qiziqtirish kelajakda mazkur sohada ko‘p mutaxassislar yetishib chiqishiga olib keladi. Respublikamizda bu bo‘yicha potensial katta. Axir aholining 65 foizini yoshlar tashkil qiladi. IT — yoshlar sohasi. Chunki bu sohada har 6 oyda yangi texnologiyalar, yangi dasturlash tillari paydo bo‘ladi. Tan olish kerak, yoshlarda bunday yangiliklar, ilg‘or texnologiyalarni qabul qilishga moyillik kuchli.
Hozirda bizda chet el IT kompaniyalari oqimi ancha ortdi. Juda ko‘p IT kompaniyalar mamlakatimizda o‘z ofislarini ochmoqda. Bunga ular uchun alohida imtiyozlar tatbiq qilinayotgani ham ijobiy ta’sir ko‘rsatmoqda. IT’ning zo‘r tomoni ham shu, unda chegara yo‘q. Mutaxassis o‘ziga qulay bo‘lgan mamlakatga joylashadi va dunyoning xohlagan davlatiga xizmat ko‘rsata oladi. Bu soha rivoji O‘zbekiston uchun valyuta oqimi, eksport hajmi oshishiga va umuman iqtisodiyot o‘sishiga olib keladi.
Xorijlik mutaxassislar yoshlarimizga bilim berish uchun kelmoqda. Bu juda yaxshi tendensiya. Ammo mutaxassis kelib, ketaversa bizga foydasi bo‘lmaydi. Undan bilim olishimiz, texnologiyalarni o‘rganishimiz kerak.
Izoh (0)