Halokatga uchragan Airbus A320 uchuvchisiga qasddan qotillik qilish bo‘yicha ish ochildi
Germanwings kompaniyasining Airbus A320 samolyoti ikkinchi uchuvchisiga nisbatan “qasddan qotillik qilish to‘g‘risidagi” ish qo‘zg‘atildi. U, tergov ma’lumotlariga ko‘ra, avialaynerni ataylab yerga qulatgan. Bu haqda Marsel prokurori Bris Roben 26-mart, payshanba kungi matbuot anjumanida aytib o‘tdi, deb yozadi “Korrespondent.net”.
“150 kishi uchun javobgar bo‘lgan bir paytda buni o‘z joniga qasd qilish deb atab bo‘lmaydi”, — dedi Roben.
Prokuror ikkinchi uchuvhi Andreas Lyubits ongli ravishda balandlikni pasaytirganini aytdi. “Uning buni nima sababdan qilgani hozircha bizga ma’lum emas, biz shuni bilamizki, samolyotni u qulatgan”, — deya ta’kidladi Roben.
Marsel prokurori so‘zlariga ko‘ra, ikkinchi uchuvchi — Germaniyaning 28 yoshli fuqarosi, biroq uning etnik kelib chiqishi va diniy mansubligi noma’lum. Shuningdek uning terrorchilar bilan aloqadorligi bo‘lmagan.
“Buni terakt deb atash uchun hech qanday asos yo‘q. Endi biz bu odamning atrofidagi kishilarni o‘rganamiz”, — dedi prokuror.
Uning qo‘shimcha qilishicha, o‘lim juda tez sodir bo‘lgan. Samolyot tog‘ga soatiga 700 km tezlikda kelib urilgan.
Avvalroq Airbus A320 samolyotining ikkinchi uchuvchisi ataylab havo kemasi komandiriga kabina eshigini ochmagani ma’lum bo‘lgan edi. “Qora quti”dan olingan yozuvda uchuvchi qaytadan kabinaga kirmoqchi bo‘lgani, biroq buni uddalay olmaganini eshitish mumkin. Uchuvchi dastlab eshikni sekin taqillatgan, so‘ng qattiqroq urgan, shundan keyin esa eshikni urib sindirmoqchi bo‘lgan, biroq uddalay olmagan. Oxir-oqibat u kabinaga kira olmagan.
Eslatib o‘tamiz, 24-mart kuni Barselonadan Dyusseldorfga parvoz qilayotgan Airbus A320 samolyoti Fransiya janubida, Alp tog‘lari ustida halokatga uchrashi oqibatida layner bortida bo‘lgan 150 kishining barchasi halok bo‘lgan edi.
