OAV: A320 halokatining taxmin qilinayotgan aybdori 1,5 yil ruhiy shifokor huzurida davolangan

Germanwings aviakompaniyasi samolyoti halokatida aybdor deb hisoblanayotgan uchuvchi Andreas Lyubits jami bir yarim yil psixiatr ko‘magida davolangani ma’lum bo‘ldi, deya xabar bermoqda “TASS” Lufthansa kompaniyasi (Germanwings kompaniyasi uning shu‘basi)ga tayanib.

Lufthansa boshqaruv raisi Karsten Shpor Lyubits bir necha oy davomida o‘qishga kelmaganini aytdi. Bild nashri buni undagi ruhiy muammolarga yo‘ymoqda. Nashr ma’lumotlariga ko‘ra, Lufthansa’ning Feniks (AQSh)dagi uchuvchilar maktabida o‘qish chog‘ida Andreasda depressiya tufayli muammolar yuzaga kelgan.

Bundan tashqari, Lyubitsning fuqarolar aviatsiyasi federal boshqarmasidagi hujjatlarida uning “alohida va muntazam tibbiy nazorat”ga ehtiyoji borligi qayd etilgan.

Avvalroq Airbus A320 samolyoti ikkinchi uchuvchisiga nisbatan “qasddan qotillik qilish to‘g‘risidagi” ish qo‘zg‘atildi. Marsel prokurori ikkinchi uchuvchi Andreas Lyubits ongli ravishda balandlikni pasaytirganini aytdi. “Uning buni nima sababdan qilgani hozircha bizga ma’lum emas, biz shuni bilamizki, samolyotni u qulatgan”, — deya ta’kidladi Roben.

Eslatib o‘tamiz, 24-mart kuni Barselonadan Dyusseldorfga parvoz qilayotgan Airbus A320 samolyoti Fransiya janubida, Alp tog‘lari ustida halokatga uchrashi oqibatida layner bortida bo‘lgan 150 kishining barchasi halok bo‘lgan edi.