Ижтимоий тармоқларда Сурхондарё вилоятининг Бандихон туманидаги мактабларнинг бирида ўқитувчи ўқувчини калтаклаётгани акс этган видео тарқалди. «Дарё» сўровига жавобан ҳолатни изоҳлаган вилоят халқ таълими бошқармаси ахборот хизмати зўравон ўқитувчи ва мактаб директори туман ИИБга олиб кетилганини маълум қилди.
Аниқланишича, воқеа Бандихон туманидаги 4-сонли умумтаълим мактабида содир бўлган.
«Биз ҳам воқеа жойига кетяпмиз. Тез орада ҳолатга аниқлик киритиб, бу ҳолат нега содир бўлгани ҳамда воқеа иштирокчиси бўлган ўқитувчи нега бу даражагача боргани ҳақида маълумот берамиз», — дейди «Дарё» сўровига жавоб берган вилоят халқ таълими бошқармаси ахборот хизмати раҳбари Рустам Жўраев.
Рустам Жўраев видеода ИИБ ходими кийимида экани тахмин қилинаётган зўравон ўқитувчи эканини, ИИБ ходими эмаслигини айтмоқда.
«Йўқ, бу киши ўқитувчи, ИИБ ходими эмас. Лекин айнан қайси фан ўқитувчиси ва исм-шарифи нима, бу ҳақда ҳозирча бизда аниқ маълумот йўқ. Бироқ тез орада аниқлаштирамиз», — дейди масъул.
Вилоят халқ таълими бошқармаси ахборот хизмати раҳбарининг қўшимча қилишича, мазкур воқеа айни пайтда туман ИИБ томонидан ўрганилмоқда.
«Мактаб директори ва шу ўқитувчи туман ИИБга чақирилган экан. Биз ҳам воқеа жойига энди борамиз», — дейди Рустам Жўраев.
Аввалроқ Андижонда ўқитувчи дарсга кечикиб келган ўқувчига ариқ сувини ичириб жазолагани, кейинчалик қилмиши учун узр сўраб чиққани хабар берилган. Сирдарё вилоятининг Гулистон шаҳрида эса ўқитувчи ва мактаб директори ўринбосари ўқувчининг яқинлари томонидан калтаклангани, кейинчалик зўравонларга уч сутка қамоқ жазоси тайинлангани хабар берилганди.
Изоҳ (0)