Sirdaryoda o‘qituvchi va maktab direktori o‘rinbosarini kaltaklagan shaxslarga 3 sutka qamoq jazosi tayinlandi

Sirdaryo viloyati Guliston tumanidagi 5-maktabda o‘quvchining yaqinlari direktor o‘rinbosari va o‘qituvchini kaltaklagani haqida xabar berilgandi. Viloyat IIB axborot xizmati rahbari Doston Shamsiddinov “Daryo”ga holat yuzasidan bo‘lib o‘tgan sayyor sud majlisi natijasi haqida ma’lumot berdi.

Qayd etilishicha, janjalga o‘quvchining maktabga kechikib kelgani va o‘qituvchining unga tanbeh bergani sabab qilib ko‘rsatilgan. O‘qituvchi darsga kechikib kelgan o‘quvchidan nimaga tartibga rioya qilmayotgani to‘g‘risida so‘ragan, evaziga esa undan haqoratli so‘zlar eshitgan. O‘qituvchi bu haqda direktor o‘rinbosariga xabar bergan. Direktor o‘rinbosari o‘quvchiga bunday holat yaxshi emasligini tushuntirmoqchi bo‘lganida o‘quvchi uni ham haqoratlab, uyiga ketib qolgan.

M. va G‘. ismli shaxslar esa umumta’lim maktabida o‘g‘li va o‘qituvchisi o‘rtasida sodir bo‘lgan tushunmovchilik sababini chuqur o‘rganmay, maktabga borgan. Maktab binosida dastlab o‘qituvchini, so‘ngra uni himoya qilmoqchi bo‘lgan direktor o‘rinbosarini ayovsiz kaltaklashgan. Oqibatda o‘qituvchi va direktor o‘rinbosariga Respublika shoshilinch tibbiy yordam ilmiy markazi Sirdaryo viloyati filialida tibbiy yordam ko‘rsatilgan.

Holat yuzasidan ushbu shaxslarga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) bilan 3 sutka qamoq jazosi tayinlangan.