Бирлашган Миллатлар Ташкилоти бош котиби Антониу Гутерриш яқин келажакда Украинадаги жанговар ҳаракатларни тўхтатиш ва тинчлик музокараларини ўтказиш имкониятини кўрмаяпти. У Венада БМТ ички конференциясининг очилиши олдидан шундай баёнот берди. Гутерриш урушни тўхтатишга яна бир бор чақирди ва Россия—Украина ўртасидаги мулоқотни ривожлантиришга ҳаракат қилаётганини таъкидлади.
Гутерришнинг сўзларига кўра, БМТ гуманитар масалаларга, жумладан, Қизил Хоч воситачилигида юзлаб одамлар олиб чиқилган Мариуполдан одамларни эвакуация қилишга алоҳида эътибор қаратмоқда. Украинадаги инсон ҳуқуқлари бўйича комиссар Людмила Денисова ҳам «Азовсталь» заводидан ярадор украиналик аскарларни эвакуация қилишда ёрдам сўради. У тиббий ёрдамга муҳтож одамларнинг ғайриинсоний шароитларда қолаётганига эътибор қаратди.
Қайд этилишича, ҳарбий хизматчиларнинг оила аъзолари Рим папаси Френсискга «Азовсталь» ҳимоячиларининг тақдирини ҳал этишда иштирок этишни сўраб мурожаат қилган.
Москва «Азовсталь»даги украиналик ҳарбийларга қуролларини ташлаб, таслим бўлишни бир неча бор таклиф қилган. Қамалдаги офицерлар сўнгги интервьюларида таслим бўлолмаслигини ва мудофаани ушлаб туриш буйруғига риоя қилишини айтган.
Аввалроқ Россия Ташқи ишлар вазирлиги Россия ва Украина ўртасидаги тинчлик музокаралари турғунлик ҳолатида қолаётганини маълум қилганди. ТИВ вакили музокараларнинг ривожланмаётганида Украинани айблаган.
Изоҳ (0)