Атом энергияси бўйича халқаро агентлик (МАГАТЭ) Угандага электр энергияси ишлаб чиқариш учун ядровий иншоот қуришни бошлашга рухсат берди, деб ёзмоқда Sinhua агентлиги.
Уганда ҳукумати Шарқий Африкада биринчи атом электр станциясини (АЭС) қуриш учун ер сотиб олганини маълум қилди. Қайд этилишича, қитъадаги қаҳва доналарининг асосий экспортчиси ҳисобланадиган ушбу мамлакат электр энергияси ишлаб чиқариш қувватини бир неча баравар оширишга ҳаракат қилмоқда.
«Биз бу қувватдан ядровий қурол эмас, қишлоқ хўжалиги учун электр энергияси ишлаб чиқаришда фойдаланишни истаймиз», — деди Уганда президенти Йовери Кагута Мусевени ва бунга сабаб сифатида мамлакатда гидроэнергетика манбаларининг тақчиллигини келтирди.
Энергетика бўйича давлат вазири Сидрониус Ополот Окасайнинг айтишича, Уганда миллий атом энергетикаси инфратузилмасини ривожлантириш бўйича МАГАТЭнинг босқичма-босқич ёндашувини қабул қилган.
Ёндашув уч босқичдан иборат: биринчиси — атом энергетикаси лойиҳасини бошлашдан олдин мажбуриятларни ва ресурсларга бўлган талабларни тушуниш, иккинчи босқич — ихтисослаштирилган атом иншоотларини қуришга тайёргарлик ишлари, учинчи босқич — қурилишни бошқариш ва фойдаланишга тайёрлашни ўз ичига олади.
Вазирнинг таъкидлашича, атом электр станциясини қуриш жойи аллақачон белгиланган, жумладан, 2000 мегаватт қувватга эга АЭСни жойлаштириш учун ер олинган.
Изоҳ (0)