Германия келажакда Россия энергия ресурсларидан тўлиқ ва бутунлай воз кечишни режалаштирмоқда. Бу ҳақда Украина ТИВ раҳбари Дмитрий Кулеба билан бирга ўтказилган анжуманда Германия ташқи ишлар вазири Анналена Бербок маълум қилган, дея хабар бермоқда ФАЗ.
«Россия энергия ташувчиларига бўлган қарамлик даражамизни нолгача туширамиз ва бу доимий кўрсаткич бўлади», — деган Анналена Бербок.
Шунингдек, Бербок Украинани хабардор қилмасдан Россия билан яширин равишда келишишга уриниш ҳолатлари бўлмаслиги ва бунга йўл қўйилмаслигини таъкидлаган. Бундан ташқари дипломат Киевга Европа иттифоқига кириш учун кўмак берилиши, бунда ҳеч қандай «энг қисқа йўл» мавжуд эмаслигини қайд этди.
8 майда «Катта еттилик» (G7) мамлакатлари, жумладан, Германия Россия нефти импортидан босқичма-босқич воз кечиш ёки АҚШ ортидан унга эмбарго қўллашни келишиб олган. Германия иқтисодиёт вазирлиги Россия нефтидан воз кечиш оғир оқибатларга олиб келишини, бироқ Берлиннинг мазкур қадамни ташлашга тайёрлигини билдирган.
Аввалроқ Германия канцлери Олаф Шольц Россияга қарши санкциялар Украина билан келишувдан кейин олиб ташланишини айтганди.
«Биз санкцияларни бекор қила оламиз ва уларни Украина билан келишган ҳолда бекор қилишимиз мумкин. Менимча Кремлда кўпчилик буни тушуниб етмаяпти. Санкциялар Россия учун оғир оқибатларни олиб келади», — деган Шольц.
Изоҳ (0)