Юнусободда ЙПХ ходимини уриб юборган Tracker ҳайдовчисига 2 йилга ахлоқ тузатиш ишлари жазоси тайинланди
Тошкент шаҳри Юнусобод туманида Tracker машинаси ҳайдовчиси Cobalt ва ЙПХ инспекторини уриб юбориб, ағдарилгани ҳақида хабар берилганди. Тошкент шаҳар судлари ҳайдовчига нисбатан суд ҳукмини эълон қилди.
Қайд этилишича, воқеа 2021 йилнинг 23 сентябрь куни соат 07:30 ларда Юнусобод тумани Амир Темур кўчасида содир бўлган. Тошкент шаҳар ИИББ ЙҲХБ инспектори кичик сержант Анвар Отабоев хизмат вазифасини ўташ жараёнида Ш.У. (49 ёшли) бошқарувидаги Cobalt автомашинасини ҳуштак ва жезл орқали тўхтатган. Шу вақт унинг орқасидан ҳаракатланиб келаётган К.У. (1989 йилда туғилган, «Инновация, технология ва стратегия маркази» ДУК ҳайдовчиси) бошқарувидаги Tracker Cobalt билан тўқнашиб кетган ва хизмат олиб бораётган ЙҲХБ инспекторини уриб юбориб, ағдарилиб, дарахтга урилган.
ЙТҲ оқибатида ходим тан жароҳатлари олиб касалхонага ётқизилган. Шунингдек, Tracker Примиэр автоуловида К.У.нинг йўловчи тариқасида ўтирган турмуш ўртоғи ҳам тан жароҳатлар олиб, шифохонага олиб борилган.
Суд ҳукми
Ҳолат юзасидан Tracker ҳайдовчисига нисбатан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 1-қисми билан жиноят иши қўзғатилган. 7 апрель куни ўқилган суд ҳукмига кўра, у юқорида келтирилган модда бўйича айбдор деб топилиб, унга иш ҳақининг 15 фоизи миқдорини давлат даромади ҳисобига ушлаб қолган ҳолда 2 йил муддатга ахлоқ тузатиш ишлари жазоси тайинланган.
Халқ таълими вазирлиги қошидаги «Инновация, технология ва стратегия маркази» ДУК ҳисобидан фуқаровий даъвогар Ш.У. фойдасига 15 469 100 сўм, жабрланувчи А.А. фойдасига жами 4 060 002 сўм етказилган моддий зарар ундирилиши белгиланган.
25 апрель куни судланувчи томонидан чиқарилган ҳукм устидан апелляция тартибида шикоят берилиб, айни пайтда ушбу шикоят Тошкент шаҳар судининг жиноят ишлари бўйича судлов ҳайъати апелляция инстанциясида кўриш учун расмийлаштирилмоқда. Апелляция шикоятини кўриб чиқиш якуни бўйича қўшимча ахборот берилади.
Аввалроқ Навоийда 25 нафар йўловчи бўлган автобус ағдарилиб кетгани, Андижонда Nexia-3 билан тўқнашган Tico иккига бўлиниб кетгани, Фарғонада Tracker ва Gentra тўқнашуви оқибатида йўловчи ҳалок бўлгани хабар қилинганди.
