Бир дорини ишлаб чиқариш учун 10-15 йил керак, аммо коронавирусга қарши дорини бутун дунё бирлашиб тайёрлади. Бу ҳақда Биоорганик кимё институти директори Шавкат Салихов 10 май куни COVID-19 га қарши Ўзбекистон ва Хитой олимлари томонидан яратилган янги оригинал инновацион дори воситаси ҳамда унинг даволаш самарадорлиги тўғрисида АОКАда ўтказилган матбуот анжуманида айтиб ўтди, деб хабар берди «Дарё» мухбири.
Маълум қилинишича, Реминдевир VV116 дори препарати Хитой ва ўзбекистонлик олимларнинг илмий ҳамкорликда яратган илмий маҳсулоти бўлиб, COVID-19 га чалинган касаллик даражаси ўртача бўлган беморларни қисқа муддатларда даволаш хусусиятига эга. Мазкур дорининг хусусияти SARS-CoV-2 вирусининг кўпайишига сабаб бўлувчи RdRP ферментининг фаоллигини тезда ишдан чиқаради ва унинг организмда тарқалишини тўхтатади. Унинг дори шакли таблетка кўринишида бўлиб, тез эрувчан ва организмга сўрилувчан, ҳамда даволаш самарадорлиги бўйича ҳозиргача COVID-19 га қарши жаҳонда яратилган илғор дорилар билан рақобатлаша оладиган ва ниҳоят экспорт потенциали кенг бўлган янги, оригинал инновацион доридир.
Таъкидланишича, VV116 (Реминдевир) 2021 йили коронавируснинг ўрта ва оғир шаклларига чалинган беморларда клиник синовдан ўтказилган. Эксперт комиссияси мазкур дори воситасининг COVID-19 касаллигини даволашда самарали деган хулосага келган. 2021 йилнинг декабрь ойидан мазкур дорини Ўзбекистонда фойдаланишга рухсат берилган.
Биоорганик кимё институти директори Шавкат Салихов ушбу дорини тайёрлашда кечикилмагани ҳақида гапириб, коронавирус ҳали тугамаганини айтди.
«Коронавирус мутацияга учраб, бошқа тури чиқади. Бизда коронавирус авж олганда Хитойда йўқ бўлиб қолганди. Ҳозир эса Хитойда авжига чиқяпти яна. Бугун ўқиб қолдим, Америкада куз-қиш мавсумида 100 миллион киши касал бўлишини тахмин қиляпти. Бу бир вариант. Иккинчи вариант, албатта, коронавирус энди дастлабки йиллардаги каби оғир бўлмайди. Лекин бу вирус ҳали гриппга ўхшаб юраверади. Нимага биз гриппни йўқ қилолмаймиз? Грипп ҳам жуда қаттиқ мутация қилади. Лекин коронавируснинг мутацияси гриппникига қараганда 10 баравар тезроқ мутация бўлади. Шунинг учун ҳам мен ўйлайман бу дорининг ишлаб чиқарилиши ўз вақтида бўлмоқда. Ўзи бир дорини ишлаб чиқариш учун 10-15 йил керак. Лекин коронавирусга қарши дорини бутун дунё бирлашиб тайёрлади. Коронавирус ҳамма жойда бўляпти. Тасаввур қилинг, Хитойнинг Ухань шаҳрида 10-15 киши касал бўлганди, шунинг ортидан бутун дунёга тарқалди. Шу боис ҳам коронавирус Америкада авж оляпти, Хитойда авж оляпти дейиш тўғримас. Биз хотиржамликка берилмаймиз», — дейди мутахассис.
Изоҳ (0)