Давлат хавфсизлик хизматининг Самарқанд вилояти бўйича бошқармаси ходимлари бошқа ҳуқуқни муҳофаза қилувчи органлар билан ҳамкорликда бир нечта тезкор тадбирлар ўтказди.
Жумладан, вилоят Тадбиркорликка кўмаклашиш марказининг Самарқанд шаҳар бўлинмаси мутахассиси чорвачилик билан шуғулланмоқчи бўлган тадбиркордан 35 минг доллар олган вақтида ушланган. Аниқланишича, у Нуробод туманидаги масъулияти чекланган жамиятлардан бирига тегишли 78 гектар лалми ер майдонини 135 минг доллар эвазига тадбиркор номига расмийлаштириб беришни ваъда қилган.
Шунингдек, Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг Самарқанд туман бўлими катта инспектори ўзига тегишли фермер хўжаликнинг 20 гектар ер майдонини 50 минг долларга сотишга келишиб, олдиндан 25 минг доллар олган вақтида ушланган.
Бошқа бир ҳолатда эса Паст Дарғом туманида яшовчи 47 ёшли шахс ўзи иш бошқарувчи вазифасида фаолият юритаётган фермер хўжаликнинг 6 гектар ер майдонини мансабдор танишлари орқали харидор номига расмийлаштириб бериш эвазига талаб қилинган 170 минг доллардан 20 минг долларни олган вақтида ушланган.
Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ Сирдарёда ер учун ҳоким қарорини чиқартириб, кадастр ҳужжатини расмийлаштириб бериш эвазига 60 минг доллар сўраган шахс ушлангани, Тошкент вилоятида 2 гектар суғориладиган ерни 500 минг долларга расмийлаштириб беришни ваъда қилган жамият раҳбари қўлга олингани тўғрисида хабар берилганди.
Мавзуга доир:
Изоҳ (0)