Ўзбекистон фуқароларининг Россияга киргач, мажбурий рўйхатдан ўтиш муддати 15 кунга узайтирилди. Россия президенти Владимир Путин 1 май куни тегишли қарорни имзолади.
Россия давлат думаси ўзбекистонликларнинг Россияда рўйхатга олиш муддатини узайтириш ҳақидаги келишувни ратификация қилган.
Аввалги тартибга кўра Ўзбекистон фуқаролари етти кун ичида, Ўзбекистондаги россияликлар эса уч кун ичида рўйхатдан ўтиши шарт бўлган.
Мамлакатлар ҳукуматлари ўртасидаги келишув 2021 йилнинг 21 майида Москвада ва 2021 йилнинг 17 июнида Тошкентда имзоланган.
Эслатиб ўтамиз, 2021 йилнинг августида Россияда муҳожирлар учун рус тилидан имтиҳон ўтказишнинг янги қоидалари жорий этилганди. Унга кўра, муҳожирлар энди рус тили, Россия тарихи ва қонунчилиги бўйича имтиҳонларда бериладиган тахминий саволларни олдиндан билиб олиши мумкин. Имтиҳонлар ёзма бўлади, лекин Россияда узоқ вақт қолишни истаганлар рус тилида мулоқот қилиш қобилиятини кўрсатиши керак. Аввалроқ эса Россияда мигрантларнинг мамлакатдан чиқиб кетиши кузатилаётгани ҳақида хабар берилган эди.
Изоҳ (0)