Ота-онасидан эрта айрилиб, етимлик азобини тотган ўзбек шоу-бизнеси вакиллари (видео)

Ота-онадан айрилиш оғир дард. Ўзбек санъатининг кўплаб вакиллари ҳам бу дардни жуда эрта бошдан кечирган. «Дарё» мухбири Наргиза Муродова ота-онасидан бевақт жудо бўлган машҳурлар билан суҳбатлашиб, уларнинг кечинмалари билан танишди.

Шукурулло Исроилов

Қизиқчи Шукурулло Исроилов 3 ёшида отадан етим қолган. У отасиз ҳам моддий, ҳам маънавий жиҳатдан қийналгани ҳақида сўзлаб беради.

— Отам уч ёшимда оламдан ўтган. Рости, у инсон билан боғлиқ воқеалар ёдимда қолмаган. Оилада бувим, онам, укам ва мен яшардик. Бувимнинг оёғини трамвай босиб кетганди. Онам раҳматли ҳам ногирон эди. Онам эрта тонгдан ишлагани кетарди, бувим уйда укам иккимизга қарарди. Онамни қийнамаслик учун мактаб формалари кичкина бўлиб қолмагунча кияверардик. Ҳатто оқ кўйлагимнинг ёқаси эскириб, сарғайиб кетганидан  бувим ёқасига мато қоплаб берарди. Ямоқ солинган пайпоқларни-ку таърифлашга тил ожиз. Онамга ёрдам бериш учун 16 ёшимдан тўйларга чиқишимга тўғри келган. Аммо онам «Артистларга қўшилма, одамлар сени ҳам артист деб, қизини бермай қўяди», дерди. Машҳур санъаткорнинг жамоасида бошловчилик қилардим, аммо жуда кам пул беришарди. Бошқа танловим йўқлиги учун индамай тўйларга келаверардим, — дейди қизиқчи Шукурулло Исроилов.

Ҳалима ИбрагимоваҚизиқчи Ҳалима Ибрагимова ота-онасидан эрта айрилгани, уларнинг иккиси ҳам тўйини кўрмай вафот этганини армон билан хотирлайди. Ҳатто интервьюларининг бирида тўйини ўзи ўтказганини ҳам маълум қилганди.

— Отам раҳматли 16 ёшимда юрак хуружидан вафот этган. Ўшанда отам эндигина 42 ёшни қаршилаганди. Отам даврида оиламиз молиявий жиҳатдан умуман қийналмаган. Катта еб, катта ичишга ўрганиб қолганимиз учун отамнинг вафотидан кейин ишлашимга тўғри келган. Етти йил мобайнида «Фарҳод» бозорида ишлаганман. Бозор мени тарбиялаб, ҳаёт мактабини ўргатган, десам ҳам бўлади.  Тўрт йилдан кейин онам ҳам юрак хуружи билан касалхонада вафот этган. Онамдан 20 ёшимда етим қолганмиз. Икки опам ва синглим турмушга чиқишганди. Қўлдан келганча уларга ёрдам қилишга ҳаракат қилардим. Турмушга чиқиш ҳақида ўйламаганим учун 28 ёшимда оила қурдим, — дейди қизиқчи Ҳалима Ибрагимова.

Зарина Йўлдошева«Ўжар ҳомиладор» сериали ва Зиёданинг «Тор кўча» клипидаги роллари билан томошабинларга яхши таниш бўлган актриса Зарина Йўлдошева 12 ёшида онасидан айрилган. Отаси эса ҳали эсини таниб улгурмасидан вафот этган. Бувиси кексайиб қолгани ва оила моддий жиҳатдан қийналгани учун Зарина, унинг ука ҳамда синглисини Сирдарёдаги меҳрибонлик уйига топширишган. Зарина 16 ёшига қадар меҳрибонлик уйида тарбияланган.

— Онам оғир хасталикка чалинганди. Бир куни аҳволи ёмонлашиб қолди. Шифокор келгунига қадар онамнинг қўлларини бир дақиқа ҳам қўйиб юбормадим. Шунда қариндошларимдан бири: «Ойинг эртага кўрмагандек бўлиб кетади. Сен ташқарига чиқиб тур», деди. Афсуски, бу онам билан сўнгги видолашувимиз бўлган экан. Бола қалбим билан онамнинг соғайишига ишонгандим. Онамнинг ўлимидан кейин жуда қийналдим. Ҳар куни онам тушимга кириб, мени ўзи билан олиб кетишини айтарди. Буни бувимга айтсам, янада қийналарди. Орада ўзим ҳам хасталикка чалиниб қолдим. Ҳушимдан кетиб, ўзимни билмай қолардим. «Мен ҳам ойимдек ўлиб қолсам, синглим билан укамга ким қарайди?» — мана шу савол мени ҳаётга қайтарди, — дейди актриса Зарина Йўлдошева.

Луиза РасуловаТаниқли актриса Луиза Расулова ҳам отасидан эрта айрилган. Унинг отаси ички ишлар органлари тизимида хизмат қилган ҳамда автоҳалокат туфайли вафот этган. Актриса отасидан кейинги кунлар осон ўтмаганини таъкидлайди.

— Одатда ҳамма қизлар отасини яхши кўради. Бу меҳр менда икки ҳисса кўпроқ эди. Афсуски, айни балоғат ёшида отамдан айрилганман. Бу мен ва оиламиз учун оғир фожиа эди. Тушкунликка тушиб қолганмиз, молиявий қийинчиликларимиз ҳам бошланган. Отам вафотига қадар мактабдаги энг фаол ва аълочи ўқувчи эдим. Отамни йўқотгач, мактабга ҳам боришни истамай қолгандим. Шунда онамни ҳокимиятга чақириб, «Агар қизингиз дарсларга бормаса, қизлар колониясига жўнатамиз», дейишганди. Онамнинг изза бўлганини кўриб, роса ачингандим. Пулсиз, ҳатто ейишга нонимиз қолмаган кунлар жуда кўп бўлган. Шу сабаб акам билан 15-16 ёшдан бошлаб ишлашга мажбур бўлганмиз. У кунларни эслаш жуда оғир. Аммо бу жараён мени болаликдан меҳнатга ва яқинларимни қадрлашга ўргатди, — дейди актриса Луиза Расулова.

Малика Равшанова«Сиз мен учун энг яхши инсон» дея дадаларни мадҳ этувчи қўшиқ куйлаган Малика Равшанова отасида жуда эрта айрилган. Унинг отаси Равшан ака 27 ёшида оламдан ўтган. Хонанда отасининг исми ўзининг исми билан доим ёнма-ён тилга олинишини истаб, Равшан исмидан фамилия сифатида фойдаланади.

— Болалик гаштини ҳис қилмай катта бўлганман. 15 ёшимга қадар эрта-индин отам қайтади, деган умид билан яшаганман. Биз-ку, отасиз қийналганмиз, онамга эса икки ҳисса қийин бўлган. Онам ўша пайтларда гилам тўқиш цехида ишларди, уйга келиб келинлар сарпосига кашта тикарди. Онам қийналиб пул топаётганини кўрганим учун бирор марта қўғирчоқ ёки ширинлик олиб беринг, демаганман. Ҳатто катта танаффус пайтида дугоналарим ошхонага чиқиб, у-бу нарса олишса, мен синфда қолардим, — дейди хонанда Малика Равшанова.

Дилфуза Исмоилова

Хонанда Дилфуза Исмоилова ҳам отасидан эрта айрилган. У 27 ёшида оиланинг боши бўлишига ва совчилари эшик қоқиб турган сингилларини турмушга беришига тўғри келган.

— Болаликдан меҳнатга ўрганганман. Оиланинг бош фарзанди бўлганим учун сингилларимга ўрнак бўлишим керак, деб ҳисоблардим. Отам вафот этганидан кейин жуда қийин бўлган. Онам ҳам менга суяниб қолганди. Ўз вақтида молиявий қийинчиликлар ҳам бўлган. Шунинг учун санъат билан бирга тадбиркорлик қилишимга тўғри келган. Сингилларимни ўқитдим, турмушга бердим. Шу боис онам раҳматли ҳам мени «онам» деб эркаларди, — дейди хонанда Дилфуза Исмоилова.