«Агробанк» қишлоқ хўжалиги соҳаси вакилларининг билим ва кўникмаларини ошириш мақсадида яна бир янги лойиҳани амалга оширди. Лойиҳа доирасида фермер, деҳқонлар ва томорқа эгалари учун мўлжалланган 40 та китобдан иборат «Ўсимликлар ҳимояси» тўплами нашр этилди. Тўпламда ўсимликлар ҳимояси, касалликлар ва зараркунандаларга қарши курашиш бўйича энг керакли маълумотлар ва тавсиялар жамланган.
«Ўсимликлар ҳимояси» тўпламида мева-сабзавот, полиз экинлари, ғаллачилик каби тармоқлари ва уларда учраши мумкин бўлган муаммолар ҳақидаги илмий ва амалий маълумотлар тўлиқ келтирилган. Тўпламдаги китобларниннг ҳар бири алоҳида мавзуга ва қишлоқ хўжалиги соҳасига бағишланган бўлиб, уларда зараркунандаларга қарши курашишнинг самарали усуллари ва воситалари батафсил ёритиб берилган. Тўпламдан йирик фермерлардан тортиб, кичик томорқа эгаларигача фойдаланиши мумкин.
Тўпламни яратишда Тошкент давлат аграр университети, Ўсимликлар ҳимояси ва карантини илмий-тадқиқот институти, Нукус агротехнология институти каби билим юртлари ва илмий тадқиқот институтларининг 90 дан ортиқ илмий ходимлари иштирок этган. Мутахассисларнинг билимлари илғор хорижий тажриба уйғунлигида акс этган. Таъкидлаб ўтиш лозимки, банк қошида ташкил этилган илмий гуруҳда катта тажриба ва малакага эга бўлган мутахассислар фаолият олиб боради.
Лойиҳа муаллифларининг фикрича, янги тўплам ўсимликларни ҳимоя қилишни илмий қўллаб-қувватлаш ва аҳолининг аграр соҳадаги билим савиясини оширишга хизмат қилади.
Айни вақтда «Ўсимликлар ҳимояси» тўплами босқичма-босқич чоп этилмоқда. Келгусида юртимизнинг барча ҳудудларига намуна сифатида етказиб берилади.
Китобларнинг электрон нусхасини Telegram-бот орқали юклаб олишингиз мумкин.
Реклама ҳуқуқи асосида.
Изоҳ (0)