Тошкентда фуқаролар яшовчи ҳовли МИБ томонидан 4,7 млрд сўмга аукционга қўйилди

Тошкент шаҳар Мирзо Улуғбек туманидаги ҳовли кимошди савдосига қўйилди. Лот маълумотлари «E-auksion» порталида эълон қилинган.

Лот аукционга ҳарбий суд ҳукми билан Миробод тумани МИБ томонидан жойлаштирилган. 2008 йилда қурилган 2 қаватли уй 7 хонадан иборат. 

Ер участкасининг умумий майдони 0,10 гектар. Бинонинг майдони — 473 квадрат метр. Ҳовлида газ, сув, электр таъминоти ва канализация тизими мавжуд. 

Аукционга қўйилган ҳовлининг бошланғич баҳоси — 4,68 млрд сўм. Аризалар 2 май 09:00 га қадар қабул қилинади. Савдолар худди шу куни 10:00 да бошланади.

Лот изоҳида ёзилишича, уйда фуқаролар яшайди. Уларни суд тартибида уйдан чиқариш лозим.

Аввалроқ Тошкентдаги ҳовли МИБ томонидан 5,2 млрд сўмга аукционга қўйилгани ҳақида хабар берилган эди.