Ўзбекистонда Россия рубли 1,4 сўмга ўсиб, 152,7 сўмни ташкил қилди. Бу 2022 йилдаги янги рекорддир. Россия валютаси охирги марта 2021 йил октябрда ойида бунчалик қиммат бўлган эди.
Шу билан бирга, бошқа хорижий валюталар (доллар, евро, тенге, фунт стерлинг, юань ва иена) сўмга нисбатан арзонлашади.
Рубль нега ошиб бормоқда
«Дарё» суҳбатлашган экспертлар бунинг учта асосий сабабини айтиб ўтишди.
Биринчидан, Россиядан пул чиқиб кетиши сезиларли даражада камайди, натижада хорижий валютага бўлган талаб пасайди.
Бунга бошқа давлатларга ойига 10 000 доллардан ортиқ пул ўтказмаларини тақиқланиши, валюта айирбошлаш учун брокерларнинг мажбурий комиссиялари 12 фоиз миқдорда қилиниши, фуқароларга нақд валюта сотиш чекланиши сабаб бўлди.
Иккинчидан, Россия экспортчиларни валюта тушумининг 80 фоизини сотишга мажбур қилди, бу эса валютанинг кириб келишига ёрдам берди. Россия товарлари экспорти анча юқори даражада сақланиб қолди.
Учинчидан, компанияларга қўйилган чекловлар ва таъминот занжирларининг бузилиши Россияда импортни кескин камайтирди – чет эл валютасига камроқ товарлар сотиб олинаётганлиги сабабли, бу унга талабни камайтирди.
Худди шундай ҳолат 2020 йилнинг иккинчи чорагида пандемия даврида ҳам кузатилган, ўшанда импортнинг пасайиши рубль курсини барқарорлаштирган эди.
Кейинчалик нима бўлади?
Мутахассислар рублнинг ҳозирги мустаҳкамланиши сунъий эканлигини таъкидламоқда — санкциялар ва уруш оқибатларини ҳисобга олмаган ҳолда ҳам дунёда инфляция тезлашмоқда ва пул-кредит сиёсати кескинлашмоқда. Шу туфайли, Россияда валютага нисбатан чекловлар олиб ташланиши биланоқ рубль кескин қулаши мумкин.
Аввалроқ Россияда яқин икки йил давомида вазият жуда оғир бўлиши эълон қилингани ҳақида хабар берилган эди.
Изоҳ (0)