Ўзбекистонда апрель ойидаги энг фойдали микроқарзлар рейтинги эълон қилинди

Иқтисодий Шарҳ журнали 2022 йилнинг апрель ойида Ўзбекистонда аҳолига тақдим этилаётган энг фойдали микроқарзлар ҳақида умумий маълумот тайёрлади. 

2022 йилнинг апрель ҳолатига кўра, мижозлар мамлакатдаги мавжуд 32 банкдан 24 тасидан микроқарз олишлари мумкин.

Рейтингда кредитнинг фоиз ставкаси, муддати ва миқдори каби асосий шартлар ҳисобга олинган.

2021 йил октябрда чоп этилган олдинги шарҳ эълон қилингандан бери ўтган муддат давомида ставкалар ўртача 3−4 фоизга ўсган. Ставкалар йиллик 26 фоиздан 38 фоизгача бўлса, кредит суммаси 2,2 млн сўмдан 50 млн сўмгача бўлмоқда.

Микроқарзлар банклар томонидан фақат жисмоний шахсларга бир неча шартлар асосида тақдим етилади. Шу билан бирга, микроқарзлар миқдори қарз олувчининг тўлов қобилиятига боғлиқ, аммо 50 млн сўмдан ошмаслиги лозим. 

Микроқарзни бериш нақд пул ёки маблағларни банк картасига ўтказиш йўли билан миллий валютада амалга оширилади. Банк картаси дебет ёки кредит бўлиши мумкин.

Марказий банк ҳисоботига кўра 2021 йилда жисмоний шахсларга тижорат банклари томонидан ажратилган микроқарзлар 9,95 трлн сўмни ташкил этган.

Микроқарзлар ажратиаш ва уларни қайтариш миллий валюта – сўмда амалга оширилади. Тадқиқот шуни кўрсатдики, Ўзбекистондаги 32 та банкдан микроқарзлар фақат 24 та банк томонидан берилмоқда.

Қуйидаги банклар аҳолига микроқарзлар ажратмайди ёки бўлмаса вақтинчалик ажратилиши тўхтатилган: 

• «Капиталбанк»;
• «Ўзагроэкспортбанк»; 
• «Анорбанк»;
• «Туркистонбанк»;
• «Инвест Финанс Банк»; 
• «КДБ Банк Ўзбекистон»; 
• «Ҳи-теч банк»;
• «Эрон Садерат банк».

Ҳисоб-китобларга кўра, «Зираат банк» микроқарзлар бўйича рейтингнинг етакчисига айланди. Ушбу банкда 36 ойгача йиллик фоиз ставкаси 26 фоиз ва максимал миқдори 50 млн сўм бўлган микроқарзлар таклиф қилинмоқда.

Микроқарзлар рейтингига кўра, «Ўзсаноатқурилишбанк» 2-ўринни эгаллади, бу ерда уч йил муддатга 26,9 фоиз йиллик ставкада ва миқдори 50 млн сўмгача кредит расмийлаштириш мумкин бўлади.

Ўтган йилнинг октябрь ойидаги шарҳга нисбатан ўртача йиллик фоиз ставкаси жорий йилнинг апрель ойида 25,8 фоиздан 29 фоизга ошган.

Натижада «Қишлоқ қурилиш банк», «Ипотека банк», «Ўзмиллийбанк», «Trast банк», «Агробанк» рейтингда 3-ўринни эгаллашди ва қуйидаги тартибда микроқарзларни: йиллик фоиз ставкаси 26 фоиз, максимал миқдори 50 млн сўм ва 24 ойгача бўлган муддатга тақдим этмоқда.

Бундан ташқари, микроқарзлар бўйича энг юқори фоиз ставкалари «Давр банк» (38 фоиз) ва «Ҳамкор Банк» (38 фоиз) каби банклар томонидан ажратилмоқда.

Кредитлар бўйича маълумотлар шарҳ эълон қилинган вақт учун мавжуд. Кредит шартлари ўзгариши мумкин.

Аввалроқ Ўзбекистонда 2022 йил апрель ойи учун энг фойдали истеъмол кредитлари маълум бўлган эди.