Хитойнинг Хенан провинциясидаги аҳоли орасида биринчи марта H3N8 парранда гриппи билан касалланиш ҳолати қайд этилди. Бу ҳақда Хитой соғлиқни сақлаш давлат қўмитаси маълум қилди.
Қайд этилишича, бемор — Чжумадиян шаҳар округида яшовчи тўрт ёшли болакай. Касаллик аломатлари пайдо бўлишидан олдин, бола уй паррандалари билан контактда бўлган, у яшайдиган уй яқинида ёввойи ўрдаклар ҳам топилган. Болада биринчи аломатлар, жумладан иситма 5 апрель куни пайдо бўлган, 10 апрель куни эса аҳволи ёмонлашгани сабабли касалхонага ётқизилган. 24 апрель куни текширувдан сўнг болада H3N8 инфекцияси борлиги аниқланган.
«Мутахассисларнинг дастлабки баҳолашига кўра, H3N8 гриппи вируси паррандалардан келиб чиққан бўлиб, авваллари одамларга юқмаган. H3N8 вируси бутун дунё бўйлаб отлар, итлар, қушлар ва тюленларда топилган, бироқ одамларда H3N8 билан касалланиш ҳолатлари кузатилмаган», — дейилади хабарда.
ХХР давлат қўмитаси маълумотларига кўра, ушбу касалланиш ҳолати қушдан одамга тасодифий турлараро юқишни билдиради, вируснинг кенг миқёсда тарқалиш хавфи эса анча паст.
Аввалроқ Жаҳон соғлиқни сақлаш ташкилоти дунёнинг 12 давлатида болалар орасида келиб чиқиши номаълум гепатит тарқалгани ҳақида хабар қилганди.
Изоҳ (0)