Испания қироли мол-мулки ҳақидаги декларацияни эълон қилди

Испания қироли Фелипе VI тахтга ўтирган давридан бери илк бор ўзига тегишли мол-мулклар ҳақидаги маълумотларни ошкор этди, дея хабар берди Reuters.

Қироллик уйи эълон қилган баёнотга кўра, испан монархининг бойлиги 2,57 миллион еврога баҳоланмоқда. Қиролнинг активлари қарийб 2,3 миллионлик чек ёки жамғарма ҳисоб рақамлари, қимматли қоғозларни ўз ичига олади, айни вақтда у умумий қиймати 305 минг еврога тенг санъат асарлари, антиквариат ва заргарлик буюмларининг эгаси ҳисобланади.

Фелипе VI солиқларни тўлашидан олдин олган маблағларнинг умумий миқдори 4,3 миллион евро.

«Бугун фуқаролар ҳар доимгидан ҳам кўпроқ маънавий-ахлоқий қоидаларга риоя қилиниши, жамиятимизда барчага ҳар томонлама ибрат бўлишимизни талаб қилмоқда», – деган Испания қироли Фелипе VI.

Reuters агентлиги маълумотларига кўра, Фелипе 2014 йилда отаси Хуан Карлос қироллик оиласи аъзолари иштирокида солиқдаги қаллобликлар иши ҳамда Испания оғир инқирозни бошидан кечираётган вақтида фил овлашга бориш билан боғлиқ можаро сабаб тахтдан воз кечганидан кейин қирол бўлган.

Фелипе можаролардан узоқлашиш, монархияда ислоҳотларни амалга ошириш мақсадида опалари Елена ва Кристинани қироллик ваколатларидан маҳрум қилган. Кейинчалик 2020 йилда Фелипе отасидан қоладиган меросдан ҳам воз кечган, собиқ қиролни қироллик уйи бюджетидан маблағ олиш имкониятидан мосуво қилган.