Кредит бўйича фоиз ставкалари нега пасайгани маълум бўлди

Марказий банк кредит бўйича фоиз ставкалари нималар билан боғлиқ эканлигини маълум қилди.

Кредитлар бўйича фоиз ставкалари қуйидагича шаклланади:

• фоиз ставкалар омонатлари бўйича шаклланган фоизлар;
• банклар томонидан мижозга нисбатан ўрнатиладиган риск учун мукофот;
• банкларнинг кутилмалари;
• пул-кредит шароитлари ва бошқалар.

Март ойида жами миллий валютада ажратилган кредитлар бўйича фоиз ставкалар 20,8 фоизни, жисмоний шахслар бўйича 21,8 фоизни ҳамда тадбиркорлик субъектлари бўйича 20,2 фоизни ташкил этди.

Бунда, тадбиркорлик субъектларига ажратилган кредитлар бўйича фоиз ставкалари февраль ойидагига нисбатан 1,1 фоиз бандга пасайиши кузатилди. 

Мазкур ҳолат тадбиркорлик субъектларига ажратилган кредитлар бўйича шартномаларнинг қарийб 80 фоизи Марказий банк асосий ставкаси ўзгаргунга қадар имзоланганлиги билан изоҳланади.

Жорий йилнинг март ойида банклар томонидан миллий валютада жами 11,1 трлн сўм, шундан тадбиркорлик субъектларига 4,2 трлн сўм миқдорида кредитлар ажратилди.

Марказий банк асосий ставкасининг ўзгариши таъсири иқтисодиётдаги кредитлар бўйича фоиз ставкаларига маълум муддат кечикиш билан таъсир этади.

Аввалроқ Ўзбекистонда 2022 йил апрель ойи учун энг фойдали истеъмол кредитлари маълум бўлган эди.