AOKAda o‘tkazilgan matbuot anjumanida Ichki ishlar vazirligi mutasaddilari prezidentning 2021-yil 26-martdagi “Jamoat xavfsizligini ta’minlash va jinoyatchilikka qarshi kurashish sohasida ichki ishlar organlari faoliyatini sifat jihatidan yangi bosqichga ko‘tarish chora-tadbirlari to‘g‘risida”gi farmoni asosida sohada amalga oshirilgan ishlar haqida ma’lumot berdi. Bu haqda “Daryo” muxbir xabar bermoqda.

Qayd etilishicha, 127 nafar xizmat intizomini buzgan va 65 nafar ma’muriy huquqbuzarlik sodir etgan xodimlarga tegishli choralar ko‘rilgan. O‘z xizmat vazifalariga mas’uliyatsizlik bilan yondashgan 948 nafar profilaktika inspektorlari intizomiy jazolanib, 176 nafari ichki ishlar organlaridan bo‘shatilgan.

Profilaktika inspektorlarining shaxsiy tashabbusi bilan ularga pora taklif qilgan 24 nafar shaxs ushlanib, qonuniy choralar ko‘rilgan. Pora olishni rad etgan profilaktika inspektorlari jami 40 million 200 ming so‘m miqdorida mukofotlangan.