Самарқанд туманида 19,7 минг долларга ер майдони сотган хўжалик раҳбарининг кирдикорлари фош бўлди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Самарқанд туман бўлими томонидан терговга қадар текширув ўтказилган. Текширувда «Н.Н.» фермер хўжалиги раҳбари Н.Н. якка тартибдаги тадбиркор Н.М. ва фуқаро М.Ш.нинг ишончига кириб, уларга хўжаликнинг сувли ер майдонидан деҳқон хўжалиги ташкил қилиш учун ер ажратиб беришни ваъда қилгани аниқланган. У тадбиркор тадбиркорнинг 9,5 минг доллари ва фуқаро Ш.нинг 10,2 минг долларини олиб, Самарқанд тумани ҳокимининг 2020 йил 31 декабрдаги сохта қарорини ариза муаллифларига тақдим қилган.
Текширув давомида Н.Н. томонидан ўз айбига иқрор бўлиб, 500 доллар ва 4,5 миллион сўмни ихтиёрий қайтаргани процессуал тартибда расмийлаштирилган.
Мазкур ҳолат юзасидан Жиноят кодексининг 229-6-моддаси (суғориладиган ер участкасига ёки унинг бир қисмига бўлган ҳуқуқни сотиш ёхуд қонунга хилоф равишда бошқача тарзда ўзга шахсга бериш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Давлат кадастрлари палатаси Нуробод туман филиали мутахассислари 2 миллион сўм пора билан ушлангани, Наманганда фуқарога фермер хўжалиги ерини ажратиб бериш учун 15 минг доллар сўраган ҳоким ёрдамчиси ва унинг шериклари қўлга олингани, Андижонда темир йўл станцияси бошлиғи ака-укага ер олиб бериш учун 8 минг доллар олгани аниқлангани тўғрисида хабар берилганди.
Изоҳ (0)