Андижонда илк бор ўтказилган буйрак кўчириш операциясида ука акасига донорлик қилди

Андижон шаҳар тиббиёт бирлашмаси марказий шифохонаси Хирургия бўлимида мураккаб трансплантация жарроҳлик амалиёти — 29 ёшли уканинг бир буйраги 37 ёшли бемор акасига кўчириб ўтказилди. Бу ҳақда «Дарё»га вилоят соғлиқни сақлаш бошқармаси ахборот хизмати раҳбари Муфаззалшоҳ Муҳаммадиев хабар берди.

«Буйрак етишмовчилигининг ривожланганлик даражаси беш босқичга бўлинади. Ушбу беморда хасталик бешинчи даража — терминал босқичгача етган. Бундай ҳолатларда беморнинг ҳаётини сақлаб қолишнинг ягона усули-буйрак трансплантациясини амалга ошириш ҳисобланади. Яъни донордан соғлом буйрак олиниб, беморнинг ўз вазифасини бажармаётган буйраги ўрнига қўйилади. Натижада беморнинг умр кўриш давомийлиги 1,5-2 бараварга ошади.

Бугунги жарроҳлик амалиётида Республика ихтисослаштирилган Хирургия илмий-амалий тиббиёт маркази қон-томир жарроҳлиги ва буйрак трансплантацияси бўлими раҳбари, тиббиёт фанлари доктори Фазлиддин Бахритдинов бошчилигидаги бригада вилоятимизнинг малакали шифокорлари ҳамроҳлигида икки босқичли операцияни ўтказишмоқда», — дейди Андижон шаҳар тиббиёт бирлашмаси хирургия бўлими мудири Ҳусниддин Усмонов.

Маълум қилинишича, олти соатга яқин давом этган жарроҳлик амалиёти муваффақиятли ўтган бўлиб, ҳозирда беморларнинг аҳволи яхши.

«Февраль ойида сомса еганда ўти димланиб, мазаси бўлмаганди. Шифокорлар кўригидан ўтказганимизда буйрак етишмовчилиги мавжудлиги аниқланган. Аввалига ишонмасдан Тошкентда ҳам кўриклардан ўтказилди. Унда ҳам шу ташхис қўйилди.

Врачларнинг айтишича, касаллик бошланганига 7 йилча бўлибди. Лекин шу кунгача ўғлимда бирор маротаба касаллик аломатлари кузатилмаган. Чуқур текширишлардан ўтказилгач, пойтахтлик шифокорлар буйрак трансплантацияси амалиётини тавсия қилишди. Шунда кейин укаси Имомали бир буйрагини беришга қарор қилди. Мана ҳозир операция жараёнида. Илоҳим иккиси ҳам фарзандлари бахтига соғ бўлишсин», — дейди бемор ва донорнинг онаси Турсуной Ҳасанова.