O‘zbekiston ta’lim muassasalariga o‘qishga qabul qilish bo‘yicha Davlat komissiyasi tomonidan Ukrainadan qaytib, respublika oliy ta’lim muassasalariga o‘qishini ko‘chirish istagini bildirgan fuqarolarning arizalariga muvofiq, ularning o‘qishini soddalashtirilgan tartibda ko‘chirishga ruxsat berildi. Bu haqda Oliy va o‘rta maxsus ta’lim vazirligi ma’lum qildi.
Shu munosabat bilan, vazirlik ariza topshirgan talabalar 2022-yil 26-apreldan o‘qishni ko‘chirish istagini bildirgan oliy ta’lim muassasasiga murojaat qilishlarini so‘ragan.
Bunda, o‘qishini ko‘chirishga ruxsat berilgan fuqarolarning hujjatlarini rasmiylashtirishda avvalgi yillarda tahsil olib, so‘nggi yillarda talabalar safidan chetlatilgan yoki akademik ta’tilda bo‘lgan fuqarolarning o‘qishini ko‘chirishga rad javobi beriladi.
Eslatib o‘tamiz, 24-fevral kuni Ukrainada ta’lim olayotgan o‘zbekistonlik talabalar o‘z vataniga vaqtinchalik jo‘nab ketishi sabab mamlakat oliy o‘quv yurtlaridagi o‘qishlarini saqlab qolish masalasi bo‘yicha ko‘plab murojaatlar kelib tushayotganini inobatga olgan holda, murojaat bilan chiqqandi. Unga ko‘ra, Ukraina Ta’lim va fan vazirligi 2022-yil 25-yanvardagi 1/1266-sonli va 2022-yil 15-fevraldagi 1/2588-22-sonli xati bilan Ukrainaning barcha oliy o‘quv yurtlariga masofaviy ta’limni joriy etishni tavsiya qilgan.
Mart boshlarida prezident Shavkat Mirziyoyev talabalarni bandligini ta’minlash orqali ularning turmush darajasini oshirish yuzasidan videoselektor o‘tkazgandi. O‘shanda Oliy ta’lim vazirligi, Tashqi ishlar vazirligi, viloyat hokimlari boshchiligida komissiya tashkil etilishi va ushbu komissiya bir hafta muddatda Ukrainadan qaytgan talabalarni o‘zimizdagi oliygohlarda o‘qishini davom ettirishi uchun barcha sharoitlarni yaratib berishi ma’lum qilingan edi.
Izoh (0)