Бугун,

  • USD 10940.05
  • RUB 182.26
  • EUR 11121.65

Украина иттифоқчиларидан «бутун» самолётларни эмас, фақатгина эҳтиёт қисмлар ва уларга қўшимча ускуналарни қабул қилиб олган. Бу ҳақда Пентагон матбуот котиби Жон Кирби маълум қилди. Аввалроқ у Киевга қирувчи самолётлар ва эҳтиёт қисмлар топширилгани ҳақида гапирганди.

Фото: EPA

Фото: EPA

«Кеча брифингда Украина ‘бутун самолётлар’ни қабул қилиб олгани ҳақида айтгандим. Мен аслида ‘бутун’ демадим, аммо сўзларим шунақа таассурот қолдирди. Мен хато қилдим. Улар бошқа давлатлардан бутун самолётларни олмаган», — дейди Кирби.

Унинг таъкидлашича, Украина иттифоқчилари ва Қўшма Штатлардан икки-уч ҳафта олдингига қараганда кўпроқ самолёт эксплуатация қилиш учун «етарлича эҳтиёт қисмлар ва қўшимча ускуналарни» олган.

«Европейская правда»нинг ёзишича, Украина Қуролли кучлари, шунингдек, иттифоқчиларидан самолётлар олгани тўғрисидаги хабарларни рад этган. Маълум қилинишича, уларга Украина қуролланишидаги мавжуд самолётларни қайта тиклашга хизмат қиладиган эҳтиёт қисмлар топширилган.

Апрель бошларида президент Владимир Зеленский АҚШдан «юртини ҳимоя қилиш учун бирор нарса беришни» сўраган эди. Унинг сўзларига кўра, украиналик ҳарбийлар зирҳли нимчалар ва шлемлар ўрнига самолёт ҳамда ракеталар олишни хоҳлайди.

Кейинроқ АҚШ Сенати Украинага ленд-лиз дастури билан қурол етказиб бериш ҳақидаги қонун лойиҳасини маъқуллаганди. Қонун Жо Байденга Украинага қурол ва бошқа ёрдамлар етказиб беришни тезлаштириш имконини беради. Пентагон ҳисоб-китобларига кўра, Жо Байден президентликка келганидан бери Қўшма Штатлар Украинага 2,3 миллиард доллар ҳарбий ёрдам кўрсатган, шундан 1,6 миллиард доллари уруш бошланганидан кейин берилган.

Изоҳ
Асосий янгиликлар