Ўзбекистонда Президент мактабларига кира олмаган 5-синф ўқувчилари янги ташкил этилаётган ихтисослаштирилган мактабларга имтиҳонсиз қабул қилинади

АОКАда ўтказилган брифингда Президент таълим муассасалари агентлиги ахборот хизмати раҳбари Дилфуза Собирова агентлик тизимида янги ихтисослаштирилган мактаблар ташкил этилишини маълум қилди.

Қайд этилишича, 14 апрель куни президентнинг «Президент таълим муассасалари агентлиги тизимидаги ихтисослаштирилган мактаблар тармоғини кенгайтириш тўғрисида»ги фармони имзоланган. Унда:

• 2022 йил 1 сентябрга қадар вазирлик, идора ва ташкилотлар тасарруфида бўлган таълим муассасалари негизида 19 та ихтисослаштирилган мактаб-интернати ҳамда 141 та ихтисослаштирилган мактаби;
• 2023 йил 1 июнга қадар Халқ таълими вазирлиги тасарруфида бўлган ва фаолияти тугатилган Меҳрибонлик уйлари ва Болалар шаҳарчалари негизида 5та ихтисослаштирилган мактаб-интернати ҳамда 3 та ихтисослаштирилган мактаби;
• 2022—2024 йилларда Президент таълим муассасалар агентлиги тизимида 25 та ихтисослаштирилган мактаб-интернатлари қуриш ҳамда келгусида янги ихтисослаштирилган мактаб-интернатлар ва ихтисослаштирилган мактабларни фақат Агентлик тизимида ташкил этиш каби вазифалар белгилаб берилган.

Агар талабгор Президент мактабига 5-синф кириш имтиҳонлари иккинчи босқичида иштирок этиб, ўқишга кира олмаса, у Президент таълим муассасалари агентлиги тизимида янги ташкил этилаётган ихтисослаштирилган мактабларга имтиҳонсиз кириши мумкин. Ўқувчи ҳар бир вилоятда ташкил этилган аниқ фанларга ихтисослаштирилган мактабга ўқиш истагини билдирган тақдирда ариза топширади ва квота доирасида баллар кетма-кетлиги асосида (24 нафари) имтиҳонсиз мазкур ихтисослаштирилган мактабларга қабул қилинади.

Белгиланган қабул квотасидан ортиқ талабгорлар битта ихтисослаштирилган мактабга ўқиш истагини билдирса, устунлик юқори балл тўплаган талабгорга берилади. Янги ташкил этилаётган ихтисослаштирилган мактабларга ҳужжат топширишда талабгорнинг ҳудудий мансублиги инобатга олинмайди.

Ушбу мактабларга ишга кирмоқчи бўлган педагог кадрларга қуйидаги талаблар қўйилади:

• фан йўналиши бўйича камида бакалавр даражасидаги олий педагогик маълумот ва камида иккинчи малака тоифасига эга бўлиши;
• ўқув фанининг илмий-назарий асослари, мазмуни ва ўқув жараёнида ахборот-коммуникация технологияларини амалиётда қўллай олиши, дарс ўтиш методикаси ва уни ташкил этиш техникасини билиши;
• давлат тилида равон ёзма ва оғзаки нутқи;
• хорижий тиллардан бирини бошланғич даражада ўзлаштирган бўлиши ҳамда илғор халқаро тажрибадан хабардорлиги;
• юксак ахлоқий фазилатлар ҳамда ижтимоий-сиёсий билимларга эга бўлиши;
• фан олимпиадалари, кўрик-танловлар ва турли мусобақаларда ютуқларга эришгани ҳамда профессионал танловларда юқори натижаларни қўлга киритгани.

Рўйхати агентлик томонидан тасдиқланадиган халқаро, минтақавий ёки асосий фан олимпиадаларининг вилоят босқичида ғолиб бўлган (1, 2, 3-ўрин) умумий ўрта, ўрта махсус ва бошланғич профессионал таълим ташкилотлари ўқувчилари ўзи таълим оладиган ҳудудида жойлашган агентлик мактабларига умумий қабул параметрлари доирасида кириш имтиҳонсиз ўқишга қабул қилинади.

Янги очилган ихтисослаштирилган мактабларнинг аниқ фанлар йўналишига ўқувчилар қабули 2022/2023-ўқув йилида 5—11-синфларга, табиий фанлар йўналишига 7—11-синфларга, кейинги ўқув йилларида тегишлича 5 ва 7-синфларга амалга оширилади;

Агентлик мактабларига ўқувчиларни қабул қилиш аниқ ва табиий фанлар, хорижий тиллар ҳамда мантиқий фикрлаш бўйича ўтказиладиган кириш имтиҳонлари натижаларига кўра амалга оширилади. Кириш имтиҳонлари Агентлик ҳузуридаги Педагогик маҳорат ва халқаро илмий-амалий баҳолаш маркази томонидан халқаро ташкилотлар ҳамда Давлат тест маркази билан ҳамкорликда ўтказилади.