Ўзбекистон пенсия тизимида янги нафақа ва янги хизмат тури ишга туширилди

Ўзбекистон президентининг тегишли фармони билан 2022 йил 1 апрелдан эътиборан ўзгалар парваришига муҳтож ногиронлиги бўлган 18 ёшгача болаларнинг парвариши билан банд бўлган боланинг қонуний вакилига ҳар ойда 500 минг сўм миқдорида нафақа тўлови жорий этилди. Бу ҳақда бюджетдан ташқари Пенсия жамғармаси хабар берди.

Бунда ўзгалар парваришига муҳтож болалар тўғрисидаги маълумотларни Тиббий-ижтимоий хизматларни ривожлантириш агентлиги Пенсия жамғармасининг ахборот тизимига электрон тарзда тақдим этиб боради.

Ушбу парваришлаш нафақаси фуқароларнинг Давлат хизматлари марказлари ёки Ягона интерактив давлат хизматлари порталига (ЯИДХП) қилган мурожаатлари асосида бюджетдан ташқари Пенсия жамғармасининг туман (шаҳар) бўлимлари томонидан мавжуд бўлган электрон маълумотларга асосан тайинланади ва тўланади.

Шу билан бирга бугунги кунда Пенсия жамғармаси томонидан Ягона интерактив давлат хизматлари портали орқали 8 турдаги ижтимоий нафақалар тайинлаш учун ариза бериш, 3 турдаги пенсия (нафақа) ҳақида маълумот олиш ҳамда Пенсия жамғармаси ижро этувчи аппарати, ҳудудий бошқармалари ва туман (шаҳар) бўлимлари жойлашган биноларининг йўналишли (локация) манзилларини олиш тизими амалиётга жорий этилган.

Ушбу тизимни амалиётга жорий этиш орқали фуқаролар учун қуйидаги қулайликлар яратилган:

1. Давлат хизматларидан фойдаланиш ҳафтанинг исталган куни ва исталган вақтда ЯИДХП орқали мурожаат этишлари мумкин (тегишли давлат органларида: ҳафтанинг иш кунлари душанбадан жумагача мурожаат этиш имкони мавжуд);
2. Давлат хизматлари кўрсатиш ёки рад этиш 5 сонияда амалга оширилади (рад этиш сабаблари кўрсатилади);
3. Давлат хизматлари кўрсатилишида Пенсия жамғармаси ходимлари иштирок этмайди.

Аввалроқ Ўзбекистонда пенсия ёшига етган ходимларни ишдан бўшатиш тақиқланаётгани, Ўзбекистонда пенсияни пластик картада олувчиларга 1 фоиз қўшимча пул берилиши тўғрисида хабар берилганди.

Маълумот учун, 2022 йил 1 январь ҳолатига Ўзбекистонда пенсия ва нафақа олувчиларнинг умумий сони 4 миллион 39 минг 2 нафарга етган. Шундан 3 миллион 588 минг 4 нафари пенсия, 450,8 минг нафари нафақа олувчилар ҳисобланади.