O‘zbekistonda Prezident maktablariga kira olmagan 5-sinf o‘quvchilari yangi tashkil etilayotgan ixtisoslashtirilgan maktablarga imtihonsiz qabul qilinadi

AOKAda o‘tkazilgan brifingda Prezident ta’lim muassasalari agentligi axborot xizmati rahbari Dilfuza Sobirova agentlik tizimida yangi ixtisoslashtirilgan maktablar tashkil etilishini ma’lum qildi.

Qayd etilishicha, 14-aprel kuni prezidentning “Prezident ta’lim muassasalari agentligi tizimidagi ixtisoslashtirilgan maktablar tarmog‘ini kengaytirish to‘g‘risida”gi farmoni imzolangan. Unda:

• 2022-yil 1-sentabrga qadar vazirlik, idora va tashkilotlar tasarrufida bo‘lgan ta’lim muassasalari negizida 19 ta ixtisoslashtirilgan maktab-internati hamda 141 ta ixtisoslashtirilgan maktabi;
• 2023-yil 1-iyunga qadar Xalq ta’limi vazirligi tasarrufida bo‘lgan va faoliyati tugatilgan Mehribonlik uylari va Bolalar shaharchalari negizida 5ta ixtisoslashtirilgan maktab-internati hamda 3 ta ixtisoslashtirilgan maktabi;
• 2022—2024-yillarda Prezident ta’lim muassasalar agentligi tizimida 25 ta ixtisoslashtirilgan maktab-internatlari qurish hamda kelgusida yangi ixtisoslashtirilgan maktab-internatlar va ixtisoslashtirilgan maktablarni faqat Agentlik tizimida tashkil etish kabi vazifalar belgilab berilgan.

Agar talabgor Prezident maktabiga 5-sinf kirish imtihonlari ikkinchi bosqichida ishtirok etib, o‘qishga kira olmasa, u Prezident ta’lim muassasalari agentligi tizimida yangi tashkil etilayotgan ixtisoslashtirilgan maktablarga imtihonsiz kirishi mumkin. O‘quvchi har bir viloyatda tashkil etilgan aniq fanlarga ixtisoslashtirilgan maktabga o‘qish istagini bildirgan taqdirda ariza topshiradi va kvota doirasida ballar ketma-ketligi asosida (24 nafari) imtihonsiz mazkur ixtisoslashtirilgan maktablarga qabul qilinadi.

Belgilangan qabul kvotasidan ortiq talabgorlar bitta ixtisoslashtirilgan maktabga o‘qish istagini bildirsa, ustunlik yuqori ball to‘plagan talabgorga beriladi. Yangi tashkil etilayotgan ixtisoslashtirilgan maktablarga hujjat topshirishda talabgorning hududiy mansubligi inobatga olinmaydi.

Ushbu maktablarga ishga kirmoqchi bo‘lgan pedagog kadrlarga quyidagi talablar qo‘yiladi:

• fan yo‘nalishi bo‘yicha kamida bakalavr darajasidagi oliy pedagogik ma’lumot va kamida ikkinchi malaka toifasiga ega bo‘lishi;
• o‘quv fanining ilmiy-nazariy asoslari, mazmuni va o‘quv jarayonida axborot-kommunikatsiya texnologiyalarini amaliyotda qo‘llay olishi, dars o‘tish metodikasi va uni tashkil etish texnikasini bilishi;
• davlat tilida ravon yozma va og‘zaki nutqi;
• xorijiy tillardan birini boshlang‘ich darajada o‘zlashtirgan bo‘lishi hamda ilg‘or xalqaro tajribadan xabardorligi;
• yuksak axloqiy fazilatlar hamda ijtimoiy-siyosiy bilimlarga ega bo‘lishi;
• fan olimpiadalari, ko‘rik-tanlovlar va turli musobaqalarda yutuqlarga erishgani hamda professional tanlovlarda yuqori natijalarni qo‘lga kiritgani.

Ro‘yxati agentlik tomonidan tasdiqlanadigan xalqaro, mintaqaviy yoki asosiy fan olimpiadalarining viloyat bosqichida g‘olib bo‘lgan (1, 2, 3-o‘rin) umumiy o‘rta, o‘rta maxsus va boshlang‘ich professional ta’lim tashkilotlari o‘quvchilari o‘zi ta’lim oladigan hududida joylashgan agentlik maktablariga umumiy qabul parametrlari doirasida kirish imtihonsiz o‘qishga qabul qilinadi.

Yangi ochilgan ixtisoslashtirilgan maktablarning aniq fanlar yo‘nalishiga o‘quvchilar qabuli 2022/2023-o‘quv yilida 5—11-sinflarga, tabiiy fanlar yo‘nalishiga 7—11-sinflarga, keyingi o‘quv yillarida tegishlicha 5 va 7-sinflarga amalga oshiriladi;

Agentlik maktablariga o‘quvchilarni qabul qilish aniq va tabiiy fanlar, xorijiy tillar hamda mantiqiy fikrlash bo‘yicha o‘tkaziladigan kirish imtihonlari natijalariga ko‘ra amalga oshiriladi. Kirish imtihonlari Agentlik huzuridagi Pedagogik mahorat va xalqaro ilmiy-amaliy baholash markazi tomonidan xalqaro tashkilotlar hamda Davlat test markazi bilan hamkorlikda o‘tkaziladi.