Ўзбекистон иқтисодиёти жорий йилнинг дастлабки 3 ойида нафақат кенг кўламли ташқи таҳдидларга бардошлилик кўрсатди, балки ижобий ўсиш тенденциясини ҳам намоён этди. Бу ҳақда «Иқтисодий шарҳ» хабар берди.
Ўзбекистон Республикаси Давлат статистика қўмитаси маълумотларига кўра, жорий йил январь март ойларида Ўзбекистон ялпи ички маҳсулоти (ЯИМ) 2021 йилнинг биринчи чорагига нисбатан 5,8 фоизга ошди.
Инфляция
Биринчи чорак якунлари бўйича Ўзбекистонда инфляция ташқи таъсирлар фонида бироз тезлашди. Биринчи 3 ойда истеъмол нархлари индекси ўтган йилнинг декабрига нисбатан 2,9 фоизга ошган.
Нархлар ўсишининг тезлашиши озиқ-овқат маҳсулотларида – 2021 йилнинг илк 3 ойига нисбатан 4,4 фоизга, шунингдек, ноозиқ-овқат маҳсулотлари бўйича – 2,1 фоизга ортгани қайд этилди.
Хизматлар нархлари, аксинча, ўсиш суръатининг 1,5 фоизигача секинлашганини кўрсатди (2021 йилнинг январь март ойларида хизматлар нархларининг ўсиши 2,7 фоизни ташкил этган эди).
Инвестициялар
Жорий йилнинг дастлабки уч ойи якунлари бўйича асосий капиталга йўналтирилган инвестициялар ўтган 2 йилдаги пасайиш ва суст ўсиш фонида 26 фоизга кескин ошди.
Марказлаштирилмаган инвестициялар динамикаси 34 фоизга ўсгани қайд этилмоқда. Хусусан, жалб қилинган тўғридан-тўғри хорижий инвестициялар (ТТХИ) ва хорижий кредитлар ҳисобидан инвестициялар ҳажми 1,5 баравардан зиёд ошди.
Бевосита ТТХИ 1,7 бараварга ўсди. Корхоналар маблағлари ҳисобидан инвестициялар бўйича ҳам 30 фоизга икки қийматли ўсиш кузатилмоқда.
Бюджет инвестициялари 5 фоизга қисқарди. Шундай қилиб, биринчи чоракда инвестицияларнинг умумий ҳажмидаги марказлаштирилган инвестициялар улуши 2021 йилнинг январь—март ойларидаги 12 фоиздан 6,9 фоизга қисқарди, марказлаштирилмаган инвестициялар эса мос равишда 88 фоиздан 93 фоизга ўсди.
Биринчи уч ойда иқтисодиётнинг барча соҳаларида ишлаб чиқариш ҳажмининг ўсиши кузатилди.
Саноат ишлаб чиқариши
Саноат ишлаб чиқариши 5,7 фоизга ошди. 16 фоизлик энг катта ўсиш электр энергияси, газ таъминоти, буғлаш ва кондиционерлаш секторида кузатилди.
Хизматлар сектори
Сўнгги 3 ой якунлари бўйича хизматлар сектори икки қийматли ўсиш суръатларини кўрсатди. Бозор хизматларини кўрсатиш ҳажми 16 фоизга ошди.
Транспорт секторида хизматлар ҳажми 11,6 фоизга ошди. Юк айланмаси 2,7 фоизга, йўловчилар айланмаси 8,3 фоизга ўсди.
Қурилиш сектори
Қурилиш соҳасида 2021 йилнинг дастлабки уч ойи билан солиштирганда ўсиш динамикаси ҳам 3,8 фоиздан 6,3 фоизгача жадаллашди.
Ташқи савдо
Уч ойлик якунларга кўра, Ўзбекистон ташқи савдоси ҳажмининг ўтган йилнинг шу даврига нисбатан сезиларли ўсиши қайд этилди.
Ташқи савдо айланмаси 1,7 баравар ошиб, 13,2 миллиард долларни ташкил этди. Экспорт 2,4 бараварга ошиб, 5,8 миллиард долларни, импорт 45%га ошиб, 7,4 миллиард долларни ташкил қилди.
Импортда асосий ўсиш машина ва ускуналар етказиб беришнинг 64 фоизга (2,6 млрд доллар), саноат маҳсулотларининг 51 фоизга (1,4 млрд доллар) ўсиши ҳисобига содир бўлди.
Шунингдек, озиқ-овқат маҳсулотлари ва тирик ҳайвонлар импорти сезиларли даражада қарийб 60 фоизга (804 млн доллар), хизматлар 46 фоизга (530 млн доллар) ошди.
Шундай қилиб жаҳон иқтисодиётидаги нотинчлик давом этаётганига қарамай, 2022 йилнинг биринчи чорагида Ўзбекистон иқтисодиёти барқарор ривожланишни давом эттирди.
Жаҳон товар бозорларидаги ва йирик савдо ҳамкорлари иқтисодиётидаги мураккаб вазият мамлакатда нархлар ўсишининг тезлашувида ўз аксини топди ва келгуси ойларда ҳам салбий таъсир кўрсатиши кутилмоқда.
Аввалроқ Ўзбекистонда ялпи ички маҳсулот ҳажми 5,8 фоизга ошгани ҳақида хабар берилган эди.
Изоҳ (0)