Ўзбекистонликларнинг долларга бўлган талаби қандай ўзгаргани маълум бўлди

Аввалроқ ўзбек сўми март ойидаги инқироздан кейин барқарорлаша бошлагани хабар қилинганди.

Марказий банкнинг дастлабки ҳисоб-китобларига кўра, ушбу девальвация суръатлари қарийб барча шокларни қамраб олди.

Хусусан, март ойининг дастлабки 20 кунида хориждан пул ўтказмалари ҳажми ўртача кунлик 15 млн долларгача, аҳолининг валюта сотуви эса 32 млн долларгача пасайган ва хариди 42 млн доллардан ошган.

Апрель ойининг дастлабки 20 кунида эса пул ўтказмалари ҳажми ўртача кунлик 40 млн долларга, аҳолининг валюта сотуви 55 млн долларга етди ва ўртача кунлик валюта хариди 22 млн долларгача пасайди.

Шунингдек, ички валюта бозорида компанияларнинг хорижий валютага бўлган талаби мувозанатлашиб, апрель ойининг дастлабки 20 кунида хорижий валютага талаб март ойининг мос даврига нисбатан 13 фоизга қисқарган бўлса, таклиф ҳажми 21 фоизга ошди.

Аввалроқ Украинадаги уруш ва Россияга қарши санкциялар Ўзбекистоннинг иккиламчи даромадлари ҳажмини камайтиргани ҳақида хабар берилган эди.