Москва физика-техника институти (МФТИ) Ўзбекистондаги мактаб ўқувчилари учун сиртқи физика-техника мактабининг масофавий таълим дастурларига кириш имкониятини очади. Бу ҳақда Россия олий таълим вазирлиги хабар берди.
Лойиҳа Ўзбекистондаги таълим муассасаларида математика, физика, кимё ва информатика фанлари бўйича кадрлар тайёрлашга қаратилган.
МФТИ сиртқи физика-техника мактаби ярим аср давомида математика, физика, яқинда эса кимё ва информатика бўйича талабаларни муваффақиятли тайёрлаб келмоқда. Масофавий технологияларнинг ривожланиши мактаб ўқув дастурларини онлайн форматга ўтказиш имконини берди. Бу эса бутун дунёдан русийзабон талабаларга ўқитувчиларининг ноёб педагогик технологияларидан фойдаланиш учун йўл очиб берди.
Ўзбекистоннинг ўрта мактаб ўқувчилари жорий ўқув йилида таълим дастурларини ўзлаштиришни бошлашлари мумкин. Бундан ташқари, битирувчи синф ўқувчилари халқаро мактаб олимпиадаларида қатнашиб, институтга кириш учун имтиёзларга эга бўлишлари мумкин.
МФТИ ўқув ишлари бўйича проректори Артем Воронов мазкур лойиҳа, биринчи навбатда, илм-фан ривожига ва иқтидорли болаларни илмий-тадқиқот ишларига жалб этишга қўшилаётган ҳисса сифатида баҳоланишини таъкидлади.
Унинг фикрича, дунёнинг энг яхши университетларида ўз илмий йўналишини давом эттирмоқчи бўлганлар учун бу лойиҳа ижтимоий лифт вазифасини ўташи мумкин.
Ўзбекистон ушбу таълим лойиҳаси учун тажриба сифатида тасодифан танланмаган: биз республиканинг кучли мактаблари билан узоқ вақтдан бери яқин алоқадамиз. Шу туфайли бизнинг саъй-ҳаракатларимиз аниқ ва табиий фанларни ўқитишнинг умумий даражасига, умуман, давлатлараро ҳамкорликка фойдали таъсир кўрсатишига ишончимиз комил, — дея қўшимча қилди Артем Воронов.
Дастурда кириш тест синовларидан муваффақиятли ўтган Ўзбекистон фуқаролари иштирок этишлари мумкин бўлади.
Аввалроқ АҚШ ҳарбий маҳсулотларни ишлаб чиқариш билан шуғулланган Москва физика-техника институтига қарши санкция киритгани ҳақида хабар қилинган эди.
Изоҳ (0)