Ўзбекистонда деҳқончилик ва боғдорчиликка ихтисослашган 2,5 мингта маҳалла лидер тадбиркорлар орқали ривожлантирилади

Шавкат Мирзиёев раислигида 19 апрель куни ўтказилган видеоселектор йиғилишида деҳқончилик ва боғдорчиликка ихтисослашган 2,5 мингта маҳалла лидер тадбиркорлар орқали ривожлантирилиши айтилди. Бу ҳақда президент матбуот котиби хабар қилди.

Қайд этилишича, деҳқонлар мавсумга ўз вақтида тайёргарлик кўриши учун Қишлоқ хўжалиги жамғармасига 2 триллион сўм ажратилган. Ушбу ресурс ҳисобидан иккинчи чоракда қўшимча 350 миллиард сўм йўналтирилади. Маблағлар лидер тадбиркорлар орқали уруғ, кўчат, ўғит сотиб олиш ва бошқа харажатлар учун берилади.

Ажратилган пуллар эвазига 250 та оғир маҳалладаги 165 минг нафар аҳоли бандлигини таъминлаш вазифаси қўйилган. Яна 2,5 мингта чорвачилик, паррандачилик, балиқчилик, асаларичиликка ихтисослашган маҳаллани ривожлантириш учун:

• камида 1,5 мингта маҳаллага инкубатор;
• ҳар бир вилоятда камида 20 мингта хонадонга 20-100 тадан хонаки товуқ;
• 1000 тагача маҳаллада 5-10 та хонадонга асалари уялари тарқатилади.

Бу чора-тадбирлар орқали биринчи ярим йилликда аҳоли хонадонларида чорвачилик, паррандачилик, балиқчилик, асаларичилик йўналишларда камида 140 минг нафар аҳоли бандлигини таъминлаш вазифаси қўйилган.