Ўзбекистон Миллий гвардиясига бир қатор ваколатлар берилмоқда

Ўзбекистон Маъмурий жавобгарлик тўғрисидаги кодексида белгиланган бир қатор ҳуқуқбузарлик ишларини кўриб чиқиш ваколати Миллий гвардия органлари берилмоқда. Бу ҳақда Олий Мажлис Қонунчилик палатаси депутати Расул Кушербаев маълум қилди.

Маъмурий жавобгарлик тўғрисидаги кодекснинг қуйидаги моддалари бўйича ҳуқуқбузарликлар тўғрисидаги ишларни кўриб чиқишга ва жарима тариқасидаги маъмурий жазо чораларини қўллашга ҳақли экани белгиланмоқда:

• 187-моддасининг биринчи қисми (жамоат жойларида алкоголь маҳсулотини истеъмол қилиш);
• 188-модда (вояга етмаган шахсни ғайриижтимоий хатти-ҳаракатларга жалб қилиш);
• 188-2-модда (вояга етмаган шахснинг кўнгил очиш (дам олиш) жойларида тунги вақтда бўлишига йўл қўйиш);
• 192-модда (маиший шовқинга қарши кураш талабларини бузиш) бўйича.

Шунингдек, Миллий гвардия органларининг мансабдор шахслари Маъмурий жавобгарлик тўғрисидаги кодекснинг 61, 183, 184-2, 184-3, 185, 185-1 (божхона тўғрисидаги қонунчиликни бузиш билан боғлиқ ҳуқуқбузарликлардан ташқари) 185-2, 185-3, 186-моддаларида, 187-модданинг иккинчи қисмида, 188-1, 188-3, 189, 189-1, 190, 191, 194-1, 195-1, 196 (Миллий гвардияга тегишли қисми бўйича) ва 210-1-моддаларида назарда тутилган маъмурий ҳуқуқбузарликларни аниқлаган тақдирда, маъмурий ҳуқуқбузарлик тўғрисида баённома тузади ва белгиланган тартибда судга кўриб чиқиш учун юбориши белгиланмоқда.

Лойиҳа депутатлар томонидан биринчи ўқишда қабул қилинган.

Эслатиб ўтамиз, 2021 йилнинг августида Ўзбекистон Миллий гвардияси ходимларига фуқароларнинг автомобилларидан мажбурий тарзда фойдаланишга рухсат берилган эди.