O‘zbekiston Milliy gvardiyasiga bir qator vakolatlar berilmoqda

O‘zbekiston Ma’muriy javobgarlik to‘g‘risidagi kodeksida belgilangan bir qator huquqbuzarlik ishlarini ko‘rib chiqish vakolati Milliy gvardiya organlari berilmoqda. Bu haqda Oliy Majlis Qonunchilik palatasi deputati Rasul Kusherbayev ma’lum qildi.

Ma’muriy javobgarlik to‘g‘risidagi kodeksning quyidagi moddalari bo‘yicha huquqbuzarliklar to‘g‘risidagi ishlarni ko‘rib chiqishga va jarima tariqasidagi ma’muriy jazo choralarini qo‘llashga haqli ekani belgilanmoqda:

• 187-moddasining birinchi qismi (jamoat joylarida alkogol mahsulotini iste’mol qilish);
• 188-modda (voyaga yetmagan shaxsni g‘ayriijtimoiy xatti-harakatlarga jalb qilish);
• 188-2-modda (voyaga yetmagan shaxsning ko‘ngil ochish (dam olish) joylarida tungi vaqtda bo‘lishiga yo‘l qo‘yish);
• 192-modda (maishiy shovqinga qarshi kurash talablarini buzish) bo‘yicha.

Shuningdek, Milliy gvardiya organlarining mansabdor shaxslari Ma’muriy javobgarlik to‘g‘risidagi kodeksning 61, 183, 184-2, 184-3, 185, 185-1 (bojxona to‘g‘risidagi qonunchilikni buzish bilan bog‘liq huquqbuzarliklardan tashqari) 185-2, 185-3, 186-moddalarida, 187-moddaning ikkinchi qismida, 188-1, 188-3, 189, 189-1, 190, 191, 194-1, 195-1, 196 (Milliy gvardiyaga tegishli qismi bo‘yicha) va 210-1-moddalarida nazarda tutilgan ma’muriy huquqbuzarliklarni aniqlagan taqdirda, ma’muriy huquqbuzarlik to‘g‘risida bayonnoma tuzadi va belgilangan tartibda sudga ko‘rib chiqish uchun yuborishi belgilanmoqda.

Loyiha deputatlar tomonidan birinchi o‘qishda qabul qilingan.

Eslatib o‘tamiz, 2021-yilning avgustida O‘zbekiston Milliy gvardiyasi xodimlariga fuqarolarning avtomobillaridan majburiy tarzda foydalanishga ruxsat berilgan edi.