Жиззах вилояти ҳудудидан ўтувчи Зафаробод—Пахтакор автомобиль йўлида Nexia автомобили ёниб кетди, деб хабар беради вилояти ФВБ ахборот хизмати.
Маълум қилинишича, 17 апрель куни соат 19:09 ларда Жиззах вилояти Фавқулодда вазиятлар бошқармасига 4П-190 автомобиль йўлининг Жиззах вилоятининг Зафаробод тумани ҳудудидан ўтувчи қисмида Nexia автомобили ёнаётгани тўғрисида хабар келиб тушган.
Хабарга асосан ёнғин жойига Зафаробод тумани ФВБдан ёнғин-қутқарув экипажи юборилган. Қутқарувчилар ёнғин жойига соат 19:14 да етиб боришган, соат 19:19 да ёнғин батамом ўчирилган.
Аниқланишича, Зафаробод—Пахтакор йўналишида ҳаракатланаётган Nexia-2 машинаси ҳайдовчиси бошқарувни йўқотиши ва қарама-қарши йўналишдаги Nexia-3 машинаси билан тўқнашуви натижасида машинада ёнғин келиб чиққан.
Йўл-транспорт ҳодисаси оқибатида бир нафар фуқаро вафот этган, яна уч нафар фуқаро турли тан жароҳатлари билан туман тиббиёт бирлашмасига ётқизилган.
Эслатиб ўтамиз, 14 апрель куни Сурхондарё вилояти Ангор тумани ҳудудидан ўтувчи 4Р-102 автомобиль йўлида Nexia-3 автомашинаси ҳайдовчиси ҳаракатланиш чоғида бошқарувни йўқотган ва қарама-қарши томондан келаётган яна бир Nexia-3 машинаси билан тўқнашганди. Оқибатда автотранспорт воситаларининг бирида ёнғин юзага келган. Йўловчилар — Қ.Р. (23 ёшли, эркак), А.Й. (23 ёшли, аёл) ва ҳайдовчи О. ҳаёт учун хавфли бўлган оғир тан жароҳати олиб, воқеа жойида ҳалок бўлган.
Аввалроқ Қамчиқ довонида суюлтирилган газ ортилган юк машинаси бетон тўсиққа урилиб, ағдарилиши оқибатида ҳайдовчи ҳалок бўлгани тўғрисида хабар берилганди.
Изоҳ (0)