Сўнгги кунларда йўлларида содир бўлган йўл-транспорт ҳодисалари тафсилотларини тақдим этамиз.
Самарқандда Spark уриб юборган 9 ёшли қиз вафот этди
Ҳолат 11 апрель куни Самарқанд вилояти Нарпай тумани ҳудудидан ўтган йўлда содир бўлган. Тезликда ҳаракатланиб келаётган Spark автомашинаси С.ни (9 ёшли) уриб юборган. Оқибатда жабрланувчи шифохонада вафот этган.
«Оилам билан қайтаётгандим. Йўлда эҳтиётсизлик оқибатида вояга етмаган қизалоқни уриб юбордим. Ўзим шифохонага олиб бордим, у ерда кўрсатилган тиббий ёрдамга қарамай вафот этди. Ўзимни оқламоқчи эмасман, энди бу иш билан бир умр яшашга мажбурман.
Ҳайдовчилардан сўрайман, йўлда эътиборли бўлинглар, пиёдаларга йўл беринг, менинг кунимга тушманг», — дейди ҳайдовчи.
Наманганда Damas ва «Жигули» тўқнашувида 3 киши яраланди
Маълум қилинишича, ЙТҲ 5 апрель куни соат 15:00 ларда Наманган—Уйчи—Учқўрғон йўлининг 10-километрида содир бўлган. Фуқаро (1995 йилда туғилган) «ВАЗ-2106» автомашинасини бошқариб бораётиб, ҳаракат хавфсизлигини таъминлай олмай, қарама-қарши йўналишга ўтиб кетган. Қаршисидан ҳаракатланиб келаётган ҳайдовчи (1989 йилда туғилган) бошқарувида бўлган Damas автомашинаси билан тўқнашув содир этган.
Оқибатда «ВАЗ-2106» автомашинасида бўлган 3 нафар йўловчи турли даражада тан жароҳати олиб, шифохонага ётқизилган.
Ҳолат бўйича Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 1-қисми билан жиноят иши қўзғатилган.
Намангандда Nexia билан тўқнашган Damas Isuzu’га бориб урилди
Қайд этилишича, йўл транспорт ҳодисаси 10 апрель куни соат 09:00 ларда Наманган вилояти «Чорсу» МФЙ Уйчи кўчасида содир бўлган. Фуқаро (1994 йилда туғилган) Nexia-3 автомашинасини бошқариб бораётиб, ҳаракат хавфсизлигини таъминлай олмай, ҳайдовчи (1995 йилда туғилган) бошқарувида бўлган Damas автомашинасига бориб урилган. Сўнг бошқарувни йўқотиб, йўл четида тўхтаб турган Isuzu автобуснинг орқа томонига урилган.
ЙТҲ оқибатида Damas автомашинаси ҳайдовчиси чап сон суягини синиши ташхиси билан шифохонага ётқизилган.
Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 1-қисми билан жиноят иши қўзғатилган.
Андижонда 5 ёшли болани уриб юборган ҳайдовчи воқеа жойидан қочиб кетди
Ҳолат 16 апрель куни соат 19:10 атрофида Андижон вилояти Жалақудуқ тумани «Ёрқишлоқ» ҳудудида содир бўлган. Cobalt автомашинаси ҳайдовчиси 5 ёшли қаровсиз қолдирилган вояга етмаган болани уриб юборган. Ҳайдовчи болага ёрдам кўрсатмай, воқеа жойидан қочиб кетган.
Шифокорлар ёрдамида боланинг ҳаёти сақлаб қолинган.
ЙТҲ юзасидан суриштирув ишлари олиб борилмоқда.
Хоразмда маст ҳайдовчи сабаб 6 та автомобиль иштирокида ЙТҲ содир бўлди
Урганч шаҳрининг Хонқа кўчасида содир бўлган. Юк автомашинаси ҳайдовчиси спиртли ичимлик ичган. Оқибатда атрофидаги 5 та машина билан тўқнашган.
Ҳодиса оқибатида жабрланганлар ёки ҳалок бўлганлар йўқ. Ҳолат юзасидан тегишли тартибда ҳужжатлар расмийлаштирилган.
Сурхондарёда Nexia-3 ёниб кетиши оқибатида 3 киши ҳалок бўлди.
ЙТҲ 14 апрель куни Сурхондарё вилояти Ангор тумани ҳудудидан ўтувчи 4Р-102 автомобиль йўлида содир бўлган. Ангор—Жарқўрғон йўналишида ҳаракатланаётган Nexia-3 автомашинаси ҳайдовчиси ҳаракатланиш чоғида бошқарувни йўқотган ва қарама-қарши томондан келаётган яна бир Nexia-3 машинаси билан тўқнашган.
Оқибатда автотранспорт воситаларининг бирида ёнғин юзага келган. Йўловчилар — Қ.Р. (23 ёшли, эркак), А.Й. (23 ёшли, аёл) ва ҳайдовчи О. ҳаёт учун хавфли бўлган оғир тан жароҳати олиб, воқеа жойида ҳалок бўлган.
Мавзуга доир:
Изоҳ (0)